पार्टीका सबै निकायलाई उद्दारमा खटाउने कांग्रेसको निर्णय, सय दिने अभियान र दशैँको चियापान स्थगित

१३ असोज, काठमाडौं । नेपाली कांग्रेसले लगातार परेको अविरल वर्षाका कारण देशभर आएको बाढी र पहिरोमा परेकाहरूको उद्धारका लागि पार्टीका सबै संगठनहरु परिचालित गर्ने निर्णय गरेको छ । साथै कांग्रेसको सय दिने अभियान र दशैँको कोजाग्रत पूर्णिमामा आयोजना गर्दै आएको चियापान कार्यक्रम पनि स्थगित गरेको छ । 
 
कांग्रेसले संगठनको सय दिने अभियान स्थगन गर्ने निर्णय आज बसेको पार्टी केन्द्रीय कार्यसम्पादन समिति बैठकले गरेको हो । पार्टी प्रवक्ता प्रकाशशरण महतले कोजाग्रत पूर्णिमासम्मका लागि अभियान स्थगन गरिएको जानकारी दिए ।  उनले सम्पूर्ण पार्टी पंक्तिलाई उद्धार र राहत कार्यमा सम्पूर्ण शक्ति केन्द्रित गर्ने निर्णय भएको जानकारी दिए । 

उनले कोजाग्रत पूर्णिमामा कांग्रेसले गर्दै आएको चियापान कार्यक्रम पनि नगर्ने निर्णय भएको बताए । पार्टीका सांसद, केन्द्रीय सदस्य, भातृ संघसंस्था सबैलाई बाढी र पहिरोमा फसेकाहरूको उद्धार गर्न खटाइने उनले बताए । साथै उद्धार तथा राहतमा ढिलाई नगर्न  तीनै तहका  सरकारलाई कांग्रेसले आग्रहसमेत गरेको छ ।