एभरेष्ट महिला भलिबल लिग: चितवनमाथि काठमाडौं ३–१ सेटले विजयी

१५ असोज, काठमाडौं । जारी एभरेष्ट महिला भलिबल लिग अन्तर्गत काठमाडौँ स्पाइकर्सले चितवन शक्तिलाई पराजित गरेको छ । मंगलबार सम्पन्न खेलमा काठमाडौंले चितवनलाई ३-१ सेटले पराजित गरेको हो । पहिलो सेटमा २५-२१ ले पराजित भएको काठमाडौंले खेलमा कमब्याक गर्दै त्यसपछि तिनै सेट लगातार जितेको थियो । काठमाडौँले दोस्रो सेट २५-१०, तेस्रो सेट २५-२२ र चौथो सेट २५-१७ ले जितेको थियो । यो काठमाडौँको दोस्रो खेलमा पहिलो जित हो । त्यस्तै पहिलो खेलमा जित हासिल गरेको चितवनले दोस्रो खेलमा हार बेहोरेको छ ।