आदिवासी जनजाति महासङ्घ ११ लाख खर्चगर्दै, प्रदेश १ का मुख्यमन्त्री राई र मन्त्री आङवोलाई नागरिक अभिनन्दन

विराटनगर । प्रदेश नं १ मुख्यमन्त्री शेरधन राई र आर्थिक मामिला तथा योजनामन्त्री इन्द्रबहादुर आङवोलाई नेपाल आदिवासी जनजाति महासङ्घ मोरङले नागरिक अभिनन्दन गर्ने निर्णय गरेको छ ।

महासङ्घ मोरङका अध्यक्ष मिलनकुमार राईले आज यहाँ पत्रकार सम्मेलनको आयोजना गरी यही वैशाख २० र २१ मोरङको गछियामा हुने चौथो जिल्ला अधिवेशनको समापनको अवसरमा अभिन्नदन गर्ने जानकारी दिए ।

मोरङमा २९ आदिवासी जनजाति समुदायको बसोबास रहे पनि २० जातीय समुदायको १७ स्थानीय निकायमा महासङ्घको सङ्गठन रहेको छ । महासङ्घले आदिवासी जनजातिका राष्ट्रिय पर्व यथावत राख्नुपर्ने जनजाति आयोगका लागि सम्पन्न बनाउनुपर्ने, संविधान संशोधन गरी सबैको बनाउनुपर्ने र पहिचानको आधारमा प्रदेशको नामाङ्कन र सिमाङ्कन हुनुपर्ने र स्थायी राजधानी सबैलाई सहज पहुँच हुने मध्यभागमा राख्नुपर्ने अधिवेशनमा मुख्य मुद्दा हुने पत्रकार सम्मेलनमा जानकारी दिइयो । अधिवेशनले सहमतिको आधारमा नेतृत्व चयन गर्ने र रु ११ लाख खर्च लाग्ने अनुमान गरिएको छ ।