प्रधानन्यायाधीशमा राउतको आज शपथ, सर्वोच्चमा स्वागत र विदाइको विशेष कार्यक्रम

२० असोज, काठमाडौं । प्रधानन्यायाधीशको रूपमा संसदीय सुनुवाइ समितिबाट अनुमोदन भएका प्रकाशमान सिंह राउतलाई आज पद तथा गोपनीयताको शपथ गराइने भएको छ । राष्ट्रपति भवनमा दिउँसो १ः३० बजे प्रधानन्यायाधीशको शपथ समारोह आयोजना गरिएको राष्ट्रपति कार्यालयले जनाएको छ । 
 
यसअघिका प्रधानन्यायाधीश विश्वम्भरप्रसाद श्रेष्ठले असोज १९ गते देखि अवकाश लिएकाले राउतलाई आज शपथ गराइन लागेको हो । उनको पदभार ग्रहणका लागि सर्वोच्च अदालत  प्रशासनले पनि तयारी थालेको छ । नयाँ प्रधान न्यायाधीश राउतलाई वरिष्ठतम न्यायाधीश सपना प्रधान मल्लले स्वागत गर्ने कार्यक्रम छ । संवैधानिक परिषद्ले वरिष्ठतम् न्यायाधीश राउतलाई प्रधानन्यायाधीश नियुक्त गर्न गत भदौ ३१ गते सिफारिस गरेको थियो ।

असोज १६ गते उनी संसदीय सुनुवाइबाट सर्वसम्मत अनुमोदन भएका थिए। राउतले अब २०८२ चैत १७ गतेसम्म न्यायालयको नेतृत्व गर्नेछन्।  सर्वोच्च अदालतसहित देशभरका अदालत भने  घटस्थापनाकै दिनदेखि दसैँ बिदा लागू भएको छ। 

सर्वोच्च अदालत र विभिन्न अदालतमा बन्दी प्रत्यक्षीकरण सुनुवाइका लागि भने खुल्ला राखिएको छ।  यसका लागि न्यायाधीश र कर्मचारीको पालो मिलाइएको छ।