न्यायाधीश रेग्मी र चुडालको इजलासमा पर्यो बारका अध्यक्ष घिमिरेविरुद्धको रिट

१ कात्तिक, काठमाडौं । नेपाल बार एसोसिएसनका अध्यक्ष गोपालकृष्ण घिमिरेविरुद्ध दर्ता भएको रिटको पेसी न्यायाधीशद्धय कुमार रेग्मी र कुमार चुडालको इजलासमा परेको छ । घिमिरेले न्यायाधीश नियुक्तिमा प्रधान न्यायाधीशले लेनदेन गरेको आरोप लगाएपछि उनीविरुद्ध मुद्दा दर्ता भएको थियो । 

सर्वोच्च अदालतमा उपरजिस्ट्रार गोविन्द घिमिरेको प्रतिवेदनका आधारमा बार अध्यक्ष घिमिरे विरुद्ध असोज १४ गते अदालतको अवहेलना निवेदन दर्ता भएको थियो । घिमिरेले सर्वोच्च अदालतको रिक्त दुई न्यायाधीश नियुक्तिमा प्रधान न्यायाधीश विश्वम्भरप्रासद श्रेष्ठले आर्थिक लेनदेन गरेको आरोप लगाएका थिए । 
 
हाल प्रधान न्यायाधीशको रूपमा प्रकाशमानसिंह राउत रहेका छन् । न्याय परिषद् नियमावलीको विरोधमा बारले धर्ना दिइरहँदा परिषद्ले सर्वोच्चको रिक्त न्यायाधीशमा उच्च अदालतका दुई मुख्य न्यायाधीशहरू नृपध्वज निरौला र नित्यानन्द पाण्डेलाई सिफारिस गरेपछि घिमिरेले यस्तो आरोप  लगाएका थिए ।