सशस्त्र बीओपी मटिहानी तस्करी नियन्त्रणमा सक्रिय, दुई साता मै १६ लाख स्रोत नखुलेको रकम बरामद

♦जगन्नाथ साह सोनीबाट

४ कात्तिक, महोत्तरी । सशस्त्र प्रहरी बल बीओपी मटिहानीले स्रोत नखुलेको ६ लाख नगदसहित एक भारतीय नागरिकलाई पक्राउ गरेको छ । गत कात्तिक २ गते शुक्रबार साँझ ४ बजेर ३५ मिनेटको समयमा महोत्तरी जिल्लाको सीमावर्ती नगरपालिका मटिहानी वडा नं. २ धिरापुर चेकपोइन्टमा बसेको सशस्त्र प्रहरीको बीओपी मटिहानीको टोलीले उक्त रकम बरामद गरेको हो । 

बीओपी मटिहानीका सशस्त्र प्रहरी नायव निरीक्षक डोरबहादुर श्रेष्ठको कमाण्डमा खटिएको चेकजाँच टोलीले भारतबाट जनकपुर तर्फ आउँदै गरेको साइकल रोकी चेकजाँच गर्दा भारतको मधुवनी मधवापुर ग्राम पञ्चायत ४ चट्टीटोल घर भएका ३१ वर्षीय सुमित कुमार साहको रातो रंगको झोला खोली हेर्दा एक हजार दरका ६०० गोटा ६ बण्डलमा रहेको ६ लाख नेपाली रुपैयाँ बरामद गरेको हो ।

यसअघि गत असोज १७ गते पनि मटिहानी नगरपालिका वडा नं. ७ स्थित नं. २ बोर्डर सीमा इलाकाबाट १० लाख स्रोत नखुलेको नेपाली रुपैयाँ बरामद गरेको थियो ।  बीओपी मटिहानीबाट खटिएका सशस्त्र प्रहरी वरिष्ठ हबल्दार गगन डाँगीको ५ जनाको चेक प्वाईन्ट टोलीले भारतबाट नेपालतर्फ आउँदै गरेको जिल्ला महोतरी एकडाँडा गा.पा.४ बस्ने बर्ष २३ का ललित महराले ज.७.प. ७६२८ नं.को  मोटरसाइकलमा राखी उक्त रकम ल्याउँदै गरेका थिए ।

मटिहानीले स्रोत नखुलेको एक हजार दरको दश लाख नगद नेपाली रुपैयाँ र मो.सा मूल्य एक लाख गरी जम्मा मूल्य ११ लाख तथा व्यक्ति र सवारी साधनसहित नियन्त्रणमा लिई आवश्यक कार्वाहीको लागि जिल्ला प्रहरी कार्यालय महोत्तरीमा बुझाएको थियो ।