सुप्रिमबाट गोर्खा मिडियामा आएको १४ करोड २९ लाखमध्ये रवि र छविको नाममा ४ करोड ५० लाख

९ कात्तिक, बुटवल । पोखराको सुर्यदर्शन सहकारीको रकम अपचलन गरेको अभियोगमा प्रहरी हिरासतमा रहेका पूर्वगृहमन्त्री एवं राष्ट्रिय स्वतन्त्र पार्टी (रास्वपा) का सभापति रवि लामिछाने र पूर्वडीआईजी छविलाल जोशीको बुटवलको सुप्रिम सहकारी ठगी मुद्दा पनि सँगसँगै अगाडि बढ्ने भएको छ । सुप्रिम सहकारीको रकम अपचलन बारे पनि तिनीहरुविरुद्ध पक्राउ पुर्जी जारी भइसकेको छ ।    

बुटवलको सुप्रिम सहकारीबाट  १४ करोड २९ लाख ३६ हजार रुपैयाँ गोर्खा मिडियामा गएको सूर्य थापा नेतृत्वको संसदीय छानबिन विशेष समितिको प्रतिवेदनमा उल्लेख छ भने उक्त  मिडियाको पूर्वउपाध्यक्ष रहेका जोशीको नामबाट २ करोड ५० लाख रुपैयाँ र रविको नामबाट २ करोड रुपैयाँ गोर्खा मिडिया नेटवर्कमा गएको देखिएको छ । गोर्खा मिडिया नेटवर्कले ११ फागुन २०७७ मा ग्यालेक्सी टीभी सञ्चालनमा ल्याएको थियो । 

गोर्खा मिडिया नेटवर्कमा सुरुमा गितेन्द्रबाबु राई र छविलाल जोशी शेयर सदस्य थिए । त्यस बेला राई र जोशीको समान २ लाख ५० हजार कित्ता शेयर थियो । टीभी सञ्चालनमा आएको वर्ष दिन नपुग्दै ७ पुस २०७८ मा लामिछाने १ लाख ८० हजार कित्ता शेयरसहित प्रबन्ध निर्देशक बनेका थिए । त्यो बेला राईसँग ८० प्रतिशत (१० लाख २० हजार कित्ता) र रविसँग १५ प्रतिशत शेयर थियो । त्यस्तै कुमार रम्तेल, भूपेन्द्रबाबु राईलगायतको पनि शेयर रहेको थियो ।

सुप्रिम सहकारीको रकम गैर कानुनी रूपमा सारिएको विषयमा जोशीसँग यसअघि नै  रुपन्देहीमा दुई दिन बयान लिएर पोखरा पठाइएको छ । रवि अहिले पोखरामा सूर्य दर्शन सहकारीको रकम ठगीमा अनुसन्धानमा छन् । उनलाई प्रहरीले छिट्टै रुपन्देही ल्याएर सुप्रिम सहकारी विषयमा अनुसन्धान गर्ने तयारीमा प्रहरी छ । सुप्रिम सहकारीको रकम ठगीबारे छानबिन गर्न ४० जना विरुद्ध पक्राउ पुर्जी जारी भएको छ । 

सहकारीका १० हजार ३ सय ९१ बचतकर्ताले जम्मा गरेको १ अर्ब ७ करोड रकममध्ये ७८ करोड रकम अपचलन  भएपछि अनुसन्धान  प्रक्रिया अघि बढेको हो । गत वैशाख ३ गते प्रहरीले सहकारीको रकम ठगी गर्ने  २८ जनाविरुद्ध मुद्दा दायर गरेको थियो । बिहीबार रवि लामिछाने, छविलाल जोशी सहित १२  जनालाई जिल्ला अदालत रुपन्देहीबाट अनुसन्धानको लागि पक्राउ पुर्जी  जारी भएको छ ।