धादिङको थाक्रेमा यात्रुबाहक भ्यान दुर्घटना

९ कात्तिक, काठमाडौं । काठमाडौंबाट मनकामना दर्शनका लागि जाँदै गरेको भ्यान शुक्रबार दिउँसो धादिङको थाक्रे गाउँपालिका ६ मा दुर्घटना भएको छ । दुर्घटनामा  ११ जना घाइते भएका छन् । बागमती प्रदेश ०१–०३० च ७६५९ नम्बरको विद्युतीय भ्यान करिब साढे १ बजेतिर अनियन्त्रित भई सडकबाट तल खसेको थियो । 

महादेवबेसीका सहायक हबल्दार दिपक श्रेष्ठका अनुसार सो भ्यान मनकामना दर्शनका लागि जाँदै गरेकाहरुले रिजर्भ गरेका थिए । दुर्घटनामा घाइते भएकाहरुलाई महादेवबेसी प्रहरी लगायतले उद्धार गरेका थिए । 

घाइतेहरुको उपचार महादेवबेसीकै टाइम्स केयर अस्पतालमा भइरहेको छ । भ्यान दुर्घटनाको कारण खुलिसकेको छैन । तर आफैं अनियन्त्रित भई दुर्घटना भएको हुनसक्ने प्रारम्भिक अनुमान गरिएको प्रहरीले जनाएको छ ।