बुटवल–भैरहवा औद्योगिक कोरिडोरका १६ उद्योगको विद्युत लाइन काटियो

११ कार्तिक, रुपन्देही । नेपाल विद्युत प्राधिकरणले बुटवल–भैरहवा औद्योगिक कोरिडोरका १६ उद्योगको विद्युत लाइन काटेको छ ।

महसुल नतिरेको भन्दै प्राधिकरणले यस क्षेत्रका १६ उद्योगको विद्युत लाइन काटेको हो । प्राधिकरणले विद्युत लाइन काटेपछि रुपन्देही उद्योग संघले उद्योगी व्यवसायीहरूलाई त्रसित बनाएको भन्दै गम्भीर ध्यानाकर्षण भएको बताएको छ ।

आइतबार एक विज्ञप्ति जारी गर्दै संघले प्राधिकरणले बिना कुनै कानुनी आधार नेपाल बिद्युत् प्राधिकरणले जबरजस्ती डेडिकेटेड तथा ट्रंक लाइन उपभोग गरेको भनि एकतर्फी रुपमा ठहर गरी उद्योगहरूको बिद्युत् लाइन काटेर उद्योगी व्यवसायीहरूलाई त्रसित बनाएको आरोप लगाएको छ ।

रुपन्देही उद्योग संघले भनेको छ– बिना कुनै कानुनी आधार नेपाल बिद्युत् प्राधिकरणले जबरजस्ती डेडिकेटेड तथा ट्रंक लाइन उपभोग गरेको भनि एकतर्फी रुपमा ठहर गरी उद्योगहरूको बिद्युत् लाइन काटेर उद्योगी व्यवसायीहरूलाई त्रसित बनाएकोमा रुपन्देही उद्योग संघको गम्भीर ध्यानाकर्षण भएको छ ।

प्राधिकरणले मध्यरातमा उद्योगीहरुलाई तर्साउने गरी जिल्लामा ३३ केभीए विद्युतबाट संचालित १६ वटा उद्योगहरूको लाइन काटेर अहिलेको संकटमा अडिएका उद्योगीलाई झन धरासायी बनाउनेतर्फ प्राधिकरणद्वारा गरिएको गतिविधिलाई सच्याउन, उद्योग मैत्री वातावरण बनाउन र उद्योगहरुमा काटिएको विद्युत तत्कालै निःशर्त जडान गरी लाल आयोगको प्रतिवेदन कार्यान्वयनमा ल्याई सधैंको लागि विवाद समाधानका गर्न रुपन्देही उद्योग संघ माग गर्दछ ।