अख्तियारको निरन्तर निगरानीमा वीरगञ्जको ट्रायल सेन्टर

११ कात्तिक, वीरगञ्ज । अख्तियार दुरुपयोग अनुसन्धान आयोगको टोलीले पर्सा जिल्लाको वीरगञ्जस्थित यातायात व्यवस्था कार्यालय अन्तर्गत ट्रायल सेन्टरमा लगातार दोस्रो दिन पनि अनुगमन तथा निरीक्षण कार्यलाई निरन्तरता दिएको छ । 

हेटौडा कार्यालयबाट खटिएको यो टोलीले वीरगञ्ज महानगरपालिका वडा नम्बर २३, प्रसौनी विर्तास्थित ट्रायल सेन्टरमा सम्भावित अनियमितता नियन्त्रणका लागि निगरानी गरिरहेको छ । तीन महिनासम्म अवरुद्ध रहेको ट्रायल प्रक्रिया शनिबारदेखि पुनः सुरु भएको हो ।

सवारी चालक अनुमतिपत्रका लागि कार्तिक ४ गते सूचना जारी गरिएपछि ९ गते शुक्रवार लिखित परीक्षा सञ्चालन भएको थियो भने शनिबार र आइतबार मोटरसाइकल, स्कुटर, कार, जीप, डेलिभरी भ्यान, टेम्पो, अटो रिक्सा र ई–रिक्सा आदिको ट्रायल परीक्षा लिइएको थियो । अख्तियारका प्रहरी निरीक्षक बिमल गिरीको नेतृत्वमा आएको टोलीले ट्रायल प्रक्रिया पारदर्शी र निष्पक्ष बनाउने उद्देश्यले सबै गतिविधिहरूमा प्रत्यक्ष निगरानी गरिरहेको छ । टोलीले परीक्षा प्रक्रियामा सहभागिता जनाउनेहरूमा कुनै पनि त्रुटि र अनियमितता हुन नदिन गहन अवलोकन गरिरहेको छ । 

अख्तियार दुरुपयोग अनुसन्धान आयोग हेटौडाका प्रमुख उमाकान्त आचार्यले सेवाग्राहीहरूबाट प्राप्त उजुरी र गुनासोको आधारमा यो अनुगमन गरिएको बताए । उनका अनुसार सेवाग्राहीहरुले विभिन्न कठिनाइ र समस्या भोग्नुपरेको जनगुनासो आउने बित्तिकै अख्तियारले यसरी निगरानी गर्ने दायित्व पुरा गर्ने गरेको छ । आचार्यले यस प्रकारको अनुगमनले सेवाग्राहीका गुनासो समाधान गर्न र सेवाको गुणस्तरमा सुधार गर्न मद्दत पुग्ने बताए ।

अख्तियारको अनुगमनबाट ट्रायल सेन्टरमा आएका सेवाग्राहीहरुले सेवा प्रक्रियामा बढी विश्वासको महसुस गरेका छन् भने कार्यालयका कर्मचारीहरूलाई उत्तरदायी बनाउन पनि सहयोग पुगेको छ ।