वीरगञ्जमा तीन दिनदेखि अख्तियारको निगरानीमा ट्रायल

१२ कात्तिक, वीरगञ्ज । अख्तियार दुरुपयोग अनुसन्धान आयोगको टोलीले तीन दिनदेखि वीरगञ्जको ट्रायल सेन्टरमा निगरानी राखिरहेको छ । अख्तियार दुरुपयोग अनुसन्धान आयोग हेटौडाको टोलीले लगातार तीन दिनदेखि वीरगञ्ज महानगरपालिका वडा नम्बर २३, प्रसौनी विर्तास्थित यातायात व्यवस्था कार्यालय अन्तर्गतको ट्रायल सेन्टरमा कडा निगरानी गरिरहेको छ । 

शनिवारदेखि तीन महिनापछि पुनः सुरु भएको सवारी चालक अनुमतिपत्रको ट्रायल प्रक्रियामा अख्तियारका प्रहरी निरीक्षक बिमल गिरीको नेतृत्वमा टोलीले सहभागीता जनाउँदै नियम र पारदर्शितामा विशेष ध्यान दिएको छ । कार्तिक ४ गते सूचना प्रकाशित भएसँगै शुक्रवार लिखित परीक्षा सम्पन्न भएको थियो भने शनिवार र आइतवार विभिन्न वर्गका 'जस्तै, मोटरसाइकल, स्कुटर, कार, जीप, डेलिभरी भ्यान, टेम्पो, अटो रिक्सा, ई–रिक्सा' सवारी साधनको प्रयोगात्मक परीक्षा 'ट्रायल' संचालन गरियो । सोमवार भने मिनी बस, मिनी ट्रक,  बस लहरी र ट्याक्टरका लागि ट्रायल सञ्चालन गरियो ।

अख्तियारको टोलीले आफ्नो उपस्थितिबाट परीक्षा प्रक्रियामा सहभागी जनाएर कार्यक्षेत्रमै हस्तक्षेप गर्दा कर्मचारी हतोत्साहित भएको एक अधिकृतले बताए । कार्यालयमा आएर कागजात चेकजाँच गर्नु र सोधपुछ गर्नु सामान्य भएपनि लगातार तीन दिनसम्म ट्रायल सेन्टरमै बसेर निगरानी गर्दा कार्यसम्पादनमा प्रभाव पर्ने ति अधिकृतको भनाई छ । 

प्रमुख उमाकान्त आचार्यका अनुसार, सेवाग्राहीहरूबाट प्राप्त उजुरी र गुनासाहरूको आधारमा निगरानीलाई निरन्तरता दिइएको हो । सेवाग्राहीहरुले ट्रायल प्रक्रियामा अनियमितता तथा कठिनाइहरूको सामना गर्नु परेको गुनासो गरेपछि अख्तियारले चासो देखाएको र अनुगमनलाई तीव्र बनाएको उनको भनाई छ । 

टोली प्रमुख गिरीले कार्यालयको निर्देशनमा निगरानीको जिम्मेवारी सम्हालेको उल्लेख गरे । थप जानकारीका लागि उनले कार्यालयका प्रवक्ता गोविन्द प्रसाद गौतमसँग सम्पर्क गर्न सल्लाह दिए तापनि, गौतम फोन सम्पर्कमा आउन चाहेनन् । तीन दिनदेखि लगातार रुपमा प्रवक्तालाई सम्पर्क गर्ने प्रयास गर्दा पनि उनले फोन उठाएनन् ।