इमेज सहकारी ठगीको अनुसन्धानका लागि ढोरपाटनका मेयर नेपालीलाई पनि कास्की ल्याइयो

२५ कात्तिक, पोखरा । इमेज सहकारी ठगी प्रकरणमा मुछिएका ढोरपाटन नगरपालिकाका प्रमुख देवकुमार नेपालीलाई कास्की ल्याइएको छ । पोखराको सूर्यदर्शन सहकारी ठगी प्रकरणमा देवकुमार नेपालीलाई पनि कास्की अदालतमा उपस्थित गराइएको  हो ।

ढोरपाटन नगरपालिकाका मेयरसमेत रहेका इमेज सहकारीका अध्यक्ष नेपाली सूर्यदर्शन सहकारीका पूर्व उपाध्यक्ष थिए । सूर्यदर्शन सहकारीको अध्यक्ष हुन नपाएपछि त्यहीँका कर्मचारीसँग मिलेर नेपालीले बागलुङ र पोखरामा इमेज सहकारी खोलेका थिए ।

उनीविरुद्ध पोखरामा रहेको इमेज सहकारीमार्फत झन्डै ६८ करोड ठगीको आरोप लागेको छ । उनी विरुद्ध पोखरामा पनि बचतकर्ताले जाहेरी दिएका थिए । नेपालीलाई आजै पोखरा ल्याइएको प्रहरीले जानकारी दिएको हो । 
 
पोखरामा रहेको इमेज सहकारीमार्फत झन्डै ६८ करोड ठगीको आरोप लागेकाले थप अनुसन्धानको लागि उनलाई पोखरा ल्याइएको हो । ५ सय २४ जना बचतकर्ताले नेपालीविरुद्ध उजुरी दिएका छन् । मेयर देवकुमार नेपालीलाई भारतमा पक्राउ गरी नेपाल ल्याइएको थियो । नयाँ दिल्लीस्थित इन्दिरा गान्धी अन्तर्राष्ट्रिय विमानस्थलमा भारतीय प्रहरीले मेयर नेपालीलाई पक्राउ गरी नेपाललाई जिम्मा लगाएको थियो । 

ढोरपाटन नगरपालिका वडा नम्बर १ घर भएका मेयर नेपालीसहित ११ जना सञ्चालकविरूद्ध गत वर्ष असार २५ गते बागलुङ जिल्ला अदालतमा मुद्दा दर्ता भएको थियो । उनी लामो समयसम्म फरार रहेपछि रेडकर्नर नोटिससमेत जारी गरिएको थियो । मेयर नेपालीलगायत सहकारी सञ्चालकहरू विरूद्ध १ हजार ४ सय ८१ जनाले उजुरी दिएका थिए ।

बागलुङमा मात्रै सहकारीले ८ सय जना सेयर सदस्य र ३ हजार २ सय जना बचतकर्ताको डेढ अर्ब बढी रुपैयाँ बचत अपचलन गरेको देखिएको थियो । पोखरा महानगरपालिकामा रहेको सहकारीबाट ५ सय बढी बचतकर्ताको ५० करोड रुपैयाँ अपचलन गरेको आरोप उनीमाथि छ ।

उनी २०७९ वैशाखमा भएको स्थानीय तह निर्वाचनमा नेकपा (एमाले) बाट उम्मेदवार भई मेयर निर्वाचित भएका थिए। त्यसअघि उनी २०७४ को निर्वाचनमा पनि मेयर निर्वाचित भएका थिए । २०७४ को स्थानीय तहको चुनावअघि टिकट नपाएपछि उनले नेकपा (माओवादी केन्द्र) छाडेर एमाले प्रवेश गरेका थिए । सहकारी प्रकरणमा जोडिएपछि एमालेले २०८० जेठमा नेपालीलाई निलम्बन पनि गरेको थियो ।