निर्मला पन्तको बलात्कार गर्ने व्यक्ति चिन्छु भन्दै अन्तर्वार्ता दिने व्यक्ति पक्राउ, धमला पनि सीआईबीमा

२८ कात्तिक, काठमाडौं । कञ्चनपुरकी निर्मला पन्तको बलात्कारपछि हत्या भएको घटनामा आफूलाई प्रत्यक्षदर्शी बताउने नवराज अर्याललाई बुधबार प्रहरीले नियन्त्रणमा लिएको छ । सीआईबीले उनलाई मंगलबार चार घन्टा सोधपुछ गरेको थियो । यस विषयमा सीआईबीले अन्तर्वार्ता लिने पत्रकार ऋषि धमलालाई पनि सीआईबी कार्यालयमा बोलाएको छ ।   

प्राइम टाइम टेलिभिजनमा अन्तर्वार्ताका क्रममा पन्तको हत्या भएको घटनाको आफू प्रत्यक्षदर्शी बताउने गोरखा घर भई काठमाडौं बस्ने नवराज अर्याललाई सीआईबीले नियन्त्रणमा लिएको हो । बुधबार फेरि सीआईबीमा हाजिर हुन आउन भने पनि उनी सम्पर्कबिहीन भएपछि पक्राउ गरिएको हो । मोबाइल घरमै छाडेर हिँडेका उनलाई बुधबार प्रहरीले खोजेर दिउँसो नियन्त्रणमा लिएको हो । 

अन्तवार्ताका प्रस्तोता पत्रकार ऋषि धमला पनि सीआईबी कार्यालय उपस्थित भएको बताइएको छ । धमला प्रस्तोता रहेको अन्तर्वार्ताकै क्रममा अर्यालले आफू प्रत्यक्षदर्शी भएको र अभियुक्त को हो भन्नेसमेत थाहा भएको दाबी गरेका थिए । त्यससम्बन्धमा बुझ्नका लागि बोलाइएपछि धमला पनि बुधबार दिउँसो सीआईबी कार्यालय पुगेका हुन् ।  

सीआईबीले अर्यालले टेलिभिजनमा दाबी गरेका सबै विवरण झुटाे देखिएको र सो विषयमा थप अनुसन्धानका लागि अर्याल दम्पती र प्रस्तोता धमलालाई सीआईबीमा ल्याएकाे जनाएको छ । आफू खानेपानी विभागको सवारी चालक रहेको दाबी गर्ने अर्यालले आफू कञ्चनपुर पुगेको बेला निर्मलाको बलात्कार हुँदै गरेको देखेको झुटो विवरण अन्तवार्तामा दिएको प्रहरीको भनाइ छ ।