उपनिर्वाचनमा नयाँ दलले विश्वास जित्न नसक्दा जनता पुरानै दल छान्न बाध्य भए: बाबुराम भट्टराई

१८ मंसिर, काठमाडौं: नेपाल समाजवादी पार्टीका अध्यक्ष डा.बाबुराम भट्टराईले नयाँ दलहरुले जनताको विश्वास जित्न नसक्दा जनता पुरानै दलहरु रोज्न बाध्य भएको टिप्पणी गरेका छन् ।  उपनिर्वाचनको मत परिणम सार्वजनिक पछि भट्टराईले आफ्नो सामाजिक सञ्जाल फेसवुकमा स्टार्टस उल्लेख गर्दै उनले यस्तो टिप्पणी गरेका हुन् ।  जनता नयाँ विकल्प नपाएर पुरानै मध्येबाट एउटा दल छान्न बाध्य भएको उनको भनाई छ।  

नयाँ र वैकल्पिक शक्तिहरूले यसबाट पाठ सिकेर, आ–आफ्ना कमजोरीहरू सच्याएर अर्कोपटक जनतालई विश्वासिलो र भरपर्दो विकल्प दिन सक्नुपर्ने उनको सुझाव छ ।अन्यथा जनता अर्कै विकल्प खोज्न बाध्य हुने पनि उनले बताएका छन् ।  

भट्टराईले सामाजिक सञ्जालमा उल्लेख गरेका छन्, “दुइ वर्षभित्रै भएको ४१ वटा स्थानीय तहको उपनिर्वाचनमा अधिकांश ठाउँमा पहिले जितेको दलले हारेको र अर्को दलले जितेको देखिएको छ, साथै केही ठाउँलाई छाडेर अधिकांश ठाउँमा तीन पुराना दल नै एकअर्काको विकल्प बनेका छन्”

तीन दल नै एकअर्काको विकल्प जस्तो देखिएता पनि जनता असन्तुष्ट रहेको उनको बुझाई छ । उनले थप उल्लेख गर्दै भनेका छन्, ‘यसको सोझो अर्थ हो जनता असन्तुष्ट छन्, विकल्प चाहन्छन्, तर नयाँ विकल्प नपाएर पुरानै मध्येबाट एउटालाई छान्न बाध्य छन् ।’