आज बयान नसकिने भएपछि रविलाई हिरासत फर्काइयो

१८ मंसिर, चितवन । सहकारी ठगी प्रकरणको अनुसन्धानका क्रममा बयानका लागि चितवन ल्याइएका राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेको बयान आजका लागि सकिएको छ । भोलि पनि उनको बयान लिइनेछ । मंगलबारको बयान सकेर प्रहरीले उनलाई जिल्ला प्रहरी कार्यालयकाे हिरासतमा फर्काएको छ ।  

आजबाट सुरु भएको रविको बयान भोलि पनि जारी रहने सरकारी वकिलको कार्यालयले जनाएको छ । मंगलबार उनीसँग जिल्ला न्यायाधिवक्ता शान्तिप्रसाद लुइँटेलको रोहबरमा बयान लिइएको थियो । बुद्ध एयरको जहाजबाट आज बिहान मात्र उनलाई चितवन ल्याइएको थियो । साहारा सहकारीको रकम हिनामिना गरेको अभियोगमा बयानका लागि चितवन ल्याइएका रवि लामिछानेको बयान जिल्ला सरकारी वकिल कार्यालय चितवनमा भोलि पनि चल्नेछ । 

लामिछानेको बयान दिउँसो १२ बजेदेखि सुरु भएको थियो । तत्कालीन गोर्खा मिडिया प्रालिका सञ्चालक, शेयर होल्डर तथा प्रबन्ध निर्देशक रविलाई साहारा चितवन सहकारी संस्थाको रकम हिनामिना गरेको आरोप छ । असोज ९ गतेको निवेदन र जिल्ला सरकारी वकिलले दर्ता गरेको मुद्दामा लामिछानेको नाममा किटानी जाहेरी थिएन । प्रहरीले २४ जना पीडितहरुसँग मंसिर ५ गते लिएको पूरक जाहेरीमा लामिछानेसहित १७ जना विरुद्ध सहकारीको रकम हिनामिना गरेको किटानी जाहेरी परेको थियो ।

सोही जाहेरीका आधारमा लामिछाने विरुद्ध सहकारीको रकम हिनामिना गरेको अभियोगमा संगठित अपराध र सम्पत्ति शुद्धीकरणमा प्रहरीले अनुसन्धान गरिरहेको छ । सोही क्रममा आज बयानको लागि चितवन ल्याइएको हो । काठमाडौँमा बयानको क्रममा उपस्थित उनलाई पक्राउ गरिएको जिल्ला पोखरा नलगी सिधै चितवन ल्याइएको हो ।