दक्षिण कोरियामा राष्ट्रपतिको राजीनामा माग गर्दै देशभर हडतालको आह्वान

१९ मङ्सिर, सियोल । दक्षिण कोरियाको सबैभन्दा ठूलो ट्रेड युनियन संगठनले राष्ट्रपति युन सुक एलको राजीनामा माग गर्दै हडताल आह्वान गरेको छ। १० लाख भन्दा बढी सदस्य भएको ट्रेड युनियनले युनले राजीनामा नगरेसम्म हडतालको आह्वान गरेको हो ।

दक्षिण कोरियाको सबैभन्दा ठूलो श्रम युनियनहरू मध्ये एक – कोरियन कन्फेडेरेसन अफ ट्रेड युनियनले आफ्ना सदस्यहरूलाई राष्ट्रपति युन सुक योलले राजीनामा नगरेसम्म हडतालमा उत्रन आह्वान गरेको छ।

फेसबुकमा एक पोस्ट गर्दै युनियनले युनको छोटो अवधिको 'मार्सल ल'को घोषणालाई विद्रोहको अपराध भनेर वर्णन गरेको छ, जबकि यस कदमको विरोध गर्न आफ्ना १० लाख भन्दा बढी सदस्यहरूलाई सियोल र अन्य क्षेत्रीय स्थानहरूमा भेला हुन आह्वान गरेको छ। ।

युन सुक–योलले आफ्नो राजनीतिक जीवन विस्तार गर्न 'मार्सल ल' को तर्कहीन र अप्रजातान्त्रिक विधिलाई छनोट गरेका छन् किनभने उनी किनारमा धकेलिएका छन्, समूहले यसअघि एक विज्ञप्तिमा भनेको थियो।

जनताले यसलाई माफ गर्दैनन्। उनीहरूले मार्सल ल घोषणा गर्ने शासनको नियति सम्झन्छन्, सो संगठनले भनेको छ। राष्ट्रपतिले लगाएको मार्सल ल त्यहाँको संसदले केही बेरमा नै खारेज गरिदिएको थियो ।

संसदको १९०-० मतले राष्ट्रपतिको कदम खारेज भए पछि उनले मध्यरातमा आफ्नो सो कदम फिर्ता लिएको घोषणा गरेका त छन् तर विपक्षीसहित देशका अन्य संगठनले राजीनामा दिनु पर्ने माग गरेका छन्। संसदले उनको कदममा बन्देज लगाए पछि उनी सार्वजनिक स्थलमा देखिएका छैनन्। आजको सबै कार्यक्रम रद्द भएको राष्ट्रपतिको सचिवालयले जनाएको छ।