वीरगञ्जको सानो पाइला सहकारी ठगीमा रविलाई पक्राउ गरी अनुसन्धान गर्न अदालतले दियो अनुमति

१९ मंसिर, वीरगञ्ज । जिल्ला अदालत पर्साले राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेलाई पक्राउ गरी सानो पाइला सहकारी ठगीमा अनुसन्धान गर्न प्रहरीलाई अनुमति दिएको छ । पर्सा प्रहरीले रवि विरुद्ध पक्राउ अनुमति लिएको हो । 

वीरगन्जस्थित सानो पाइला सहकारीको रकम गोर्खा मिडियामा गएको देखिएपछि लामिछानेलाई पर्सामा पनि प्रहरीले अनुसन्धान गर्न अदालतसँग अनुमति मागेको थियो । रविसहित १४ जनालाई पक्राउ गर्न बुधबार जिल्ला अदालत पर्साले पक्राउ अनुमति दिएको हो । गत २ कात्तिकमा पक्राउ परेका लामिछानेको हाल चितवनमा बयान भइरहेको छ । 

पर्सामा गितेन्द्रबाबु राई, छविलाल जोशीलगायत विरुद्ध पनि पक्राउ पुर्जी जारी भएको छ । सानो पाइला सहकारीको हिनामिनामा एक चरणमा अनुसन्धान गरी प्रहरीले गत वर्ष नै मुद्दा दायर गरिसकेको छ । संसदीय विशेष छानबिन समितिको प्रतिवेदनका आधारमा थप अनुसन्धान हुन लागेको हो । जीबी राईको समूहले सञ्चालन गरेका पाँच सहकारीबाट करोडौं रकम गोर्खा मिडियामा गएको थियो । 

लामिछाने गोर्खा मिडियाको सञ्चालक तथा प्रबन्ध–निर्देशक हुँदा उनले खर्च गरेका थिए । सोही आधारमा उनी अनुसन्धानमा तानिएका हुन् । सहकारीको रकम अपचलनमा संलग्न नभए पनि गोर्खा मिडियाको सञ्चालक भएकै आधारमा पक्राउ गरेर अनेक मुद्दा चलाउन लागिएको भन्दै रास्वपाले राजनीतिक प्रतिशोधको आरोप लगाउँदै आएको छ । लामिछानेलाई अहिले चितवनमा नै राखिएको छ । बयान सकेर पोखरा वा पर्सा लाने भन्ने निर्णय भएको छैन ।