अब कोरोना भाइरसको केन्द्रबिन्दु युरोप : विश्व स्वास्थ्य संगठन

१ चैत, काठमाडौं । विश्व स्वास्थ्य संगठन ‘डब्लूएचओ’ ले कोरोना भाइरस ‘कोभिड–१९’को केन्द्रबिन्दु अब युरोप भएको बताएको छ । डब्लुएचओका प्रमुख डा. टेड्रोस अधानोम गेब्रेयसियसले अहिलेको संक्रमणको अवस्थाले महामारीको केन्द्रबिन्दु युरोप भएको बताएको बीबीसीले जनाएको छं । चीनको वुहानबाट सुरु भएको कोरोनाको संक्रमण अहिले विश्वका १३८ देशमा पुगेको छ ।

चीनमा महामारी नियन्त्रण नजिक पुगिसकेकोले माहामारीको केन्द्रबिन्दु युरोपलाई मानिएको हो । डब्लूएचओका प्रमुख गेब्रेयसियसले सबै देशहरुलाई जीवन बचाउन आक्रामक उपाय, समुदाय परिचालन र सामाजिक दूरी प्रयोग गर्न आग्रह गरे । उनले अहिले बलिरहेको संक्रमणको आगो थप फैलन नदिन सबै लाग्नुपर्ने बताए ।

धेरै युरोपियन देशहरुमा संक्रमण र मृत्युमा एकदमै उकालो लागेको खबर आइरहेको भन्दै उनले चिन्ता व्यक्त गरेका छन् पनि खबरमा उल्लेख छ ।

इटलीमा संक्रमण र मृत्यु निकै उच्च

युरोपेली देशमध्ये इटलीमा संक्रमण र मृत्यु निकै उच्च बनेको छ । पछिल्लो २४ घण्टामा मात्र इटलीमा कोरोना भाइरसको संक्रमणबाट २५० जनाले ज्यान गुमाएका छन् । यो सँगै इटलीमा ज्यान गुमाउनेको संख्या १२६६ पुगेको छ । इटलीमा १७६६० जनामा संक्रमण पुष्टि भैसकेको छ ।

यस्तै स्पेनमा १३३ जनाको ज्यान गइसकेको छ भने ५२३२ जनामा संक्रमण पुष्टि भएको छ । जर्मनी, फ्रान्स, स्वीजरल्याण्ड लगाएतका देशमा पनि संक्रमण उच्च बनेको छ । युरोपमा संक्रमण फैलिएपछि अमेरिकाले बेलायत बाहेकका देशबाट उडान बन्द गरेको छ भने अरु विभिन्न देशले पनि युरोपबाट आवातजावात बन्द गरेका छन् ।