दोब्बर भाडा लिएपनि कोरोनामा यात्रु खचाखच !

७ साउन, काठमाडौं । यातायात व्यवस्था विभागले सार्वजनिक यातायातमा सिट क्षमताभन्दा आधा कम मात्र यात्रु राख्न पाउने नियम बनाए पनि राजधानीको काँठ क्षेत्रमा लागू् हुन सकेको छैन । चार महिना लामो बन्दाबन्दी मङ्गलबार अन्त्य भएपछि धेरै मानिस बाहिर निस्कन थालेका छन् ।

सुन्दरीजलबाट रत्नपार्क चल्ने बा ३ ख ६२३ नम्बरको सार्वजनिक यातायातले जोरपाटीसम्म यात्रु उभ्याएर ल्याएको यात्रु सुरेन्द्र श्रेष्ठले बताए । सिट क्षमताभन्दा आधा कम मात्र यात्रु चढाउने नियम सरकारले लगाएको छ भनी सम्झाउँदा मानिस जान खोज्छन् भन्ने जवाफ परिचालकले दिएको उनले बताए ।

चक्रपथभित्र फाट्टफुट्ट मात्र चलेका सार्वजनिक सवारीमा नियमअनुसार नै यात्रु बसेका छन् । राजधानीकै काँठ क्षेत्रका नगरपालिकामा फाट्टफुट्ट चलेका सवारीले यात्रु ओसार्दा सिट क्षमताको आधामात्र यात्रु राख्ने नियमको ट्राफिक प्रहरीले अनुगमन गरेको छैन । चक्रपथभित्र बाहिर सिट भरिएपछि पनि यात्रु कुरेर चालकले समय बिताउँछन् । ट्राफिक प्रहरीले अनुगमन गर्ने भनिए पनि सबैतिर हुन सकेको छैन ।

महानगरीय ट्राफिक प्रहरी महाशाखा रामशाहपथका प्रवक्ता वामदेव गौतम काँठ क्षेत्रमा कम जनशक्ति भएका कारण अनुगमन हुन नसकेको स्वीकार्छन् । “टोखामा पाँच, बूढानीलकण्ठमा चार जनामात्र ट्राफिक प्रहरी छन्, यसअघि मुख्य शहरमै ट्राफिक प्रहरी केन्द्रित गरिएकामा आजदेखि सार्वजनिक यातायातमा सामाजिक दूरी अनुगमन टोली मोटरसाइकलमा खटाइएको छ”, उनले भने ।

यस्तो टोली, साँखु, गोकर्ण, भैँसेपाटीलगायत उपत्यकाका काँठ क्षेत्रमा पठाइएको हो । अनुगमनका क्रममा सिट क्षमताको आधाभन्दा बढी यात्रु राखेको पाइएमा तत्काल सार्वजनिक सवारीलाई नियन्त्रणमा राख्ने आदेश दिइएको महाशाखाले जनाएको छ ।

अनुगमनका क्रममा मङ्गलबार उपत्यकामा १८ सार्वजनिक यातायात र २७७ निजी सवारीलाई नियन्त्रणमा लिइएको प्रवक्ता गौतमले सुनाए । समातिएका सवारीलाई दिनभर नियन्त्रणमा लिएर बेलुकी ८ बजे भोलिपल्टदेखि दूरी कायम गरेर यात्रु चढाउने शर्तमा छोड्ने गरेको महाशाखाले जनाएको छ ।