लामो दूरीका गाडी पनि चल्न दिन यातायात व्यवसायीको माग

१२ साउन, काठमाडौं । लामो दुरीका गाडी पनि तत्काल खोल्न यातायात व्यवसायीले माग गरेका छन् । सरकारले भदौ १ गतेदेखि लामो र मध्यम दूरीका सवारी पनि चलाउने निर्णय गरेपनि त्यो समय लामो भएको भन्दै यात्रुको समस्यालाई हेरेर तत्काल लामो दुरीका रुटमा गाडी चलाउन दिन व्यवसायीले माग गरेका हुन् ।

नेपाल यातायात व्यवसायी राष्ट्रिय महासंघका महासचिव सरोज सिटौलाले जिल्लाभित्रको लामो दूरीको सीमानासम्म यात्रुले यात्रा गर्ने र त्यहाँबाट जोखिमपूर्ण र कष्टपूर्ण रुपमा जिल्ला पार गरेर अर्को सवारी समात्नुपर्ने बाध्यता भएको भन्दै लमो दूरीमा पनि सवारी चलाउने वातावरण बनाउन माग गरिएको बताए ।

सोमबार महासंघ, नेपाल यातायात मजदुर संघ, अखिल नेपाल यातायात मजदुर संघ, नेपाल यातायात स्वतन्त्र मजदुर संगठनले संयुक्त रुपमा प्रश विज्ञप्ति जारी गर्दै एक जिल्लाबाट अर्को जिल्लमा जानुपर्ने यात्रुले झिटिगुन्टा, बालबच्चा बोकेर, घाम पानी झेलेर पैद हिँड्नु परेको बताएका हुन् ।

यसले गर्दा बालबालिका र वृद्धवृद्धा बढी समस्या परेको भन्दै यी संघसंस्थाले अव्यवहारिक निर्णय उल्ट्याएर सबै खालका रुटमा सार्वजनिक सवारी चलाउन दिन सरकारसँग माग गरेका छन् ।