अनशनरत डा.केसीलाई अपहरण शैलीमा अस्पताल लगियो

४ असोज, काठमाडौं । अनसनरत डा. गोविन्द केसीलाई प्रहरीले बल प्रयोग गरेर अस्पताल पुर्याएको छ । गएराती डा. केसीलाई जुम्लाको रानीचौरस्थित बाबिरामष्ट मन्दिर परिसरबाट जबर्जस्ती उठाएर कर्णाली स्वास्थ्य विज्ञान प्रतिष्ठानमा लिएर राखेको हो ।

१९औं सत्याग्रहमा रहेका डा. केसीको स्वास्थ्य अवस्था कमजोर भएको भन्दै चिकित्सकहरुले अस्पताल लैजान सुझाएका थिए । चिकित्सकको सुझावअनुसार डा.केसीलाई उठाएरै भएपनि अस्पताल पुर्याइएको हो ।

अपहरणको शैलीमा अस्पताल लगिएको भन्दै डा.केसीले आपत्ति जनाएका छन् । विरोधमा उनले उपचार सेवा नलिने घोषणा गरेका छन् । खासगरी कर्णालीमा निःशुल्क शिक्षा र स्वास्थ्य सेवा हुनुपर्ने माग गर्दै डा. केसी जुम्लामा अनशन बसिरहेका छन् । आफ्ना माग पूरा नभएसम्म उपचार नलिने र जुम्ला पनि नछाड्ने डा.केसीको भनाई छ ।