बाहुबली र कटप्पा बन्दै त छैनौं ?

दोस्रो भागमा रहस्य खुल्यो, जसले धेरै दर्शकलाई अचम्मित तुल्यायो पनि तर त्यो गम्भीर परिस्थिति र घटनाको मुल्याङ्कन सोचे भन्दा हलुका रहन गयो । ज्यादै सतही ।

कटप्पालाई थाहा छ बाहुबली निर्दोष छ र उसको हत्याको आदेश गलत मात्रै हैन जघंन्य प्रवृतिको छ, तापनि बाहुबली मारिन्छ र उसको हत्या सकिनासाथ शिवगमिनीलाई आफ्नो गल्ती महसुस हुन्छ । त्यसपछि के कस्ता घटना परिघटना घटे त्यो सबै दर्शक महानुभावहरुलाई विदितै छ ।

कटप्पा शक्ति र सामर्थ्यको धनी हुँदाहुँदै पनि दासताको जन्जिरमा जेलिएको हुन्छ । शासकको आदेश अक्षरस पालन गर्नु उसको नियति बनेको छ । हामीकहाँ पनि परिस्थिति करिब करिब त्यस्तै नै छ । सत्तासिन धृतराष्ट्रहरु आफु र आफ्नालाई एकलौटी गर्न मिल्ने वातावरण निर्माणमा अहोरात्र खटिएका छन् । सम्पूर्ण राज्यसंयन्त्रको चरम दुरुपयोग गर्न किञ्चित पछि परिरहेका छैनन् ।

कुलमानहरु हारिरहेका छन्, बामदेवहरु जितिरहेका छन् तर सत्तासिन पार्टीका असंख्य कार्यकर्ताहरु दत्तचित्त भएर कटप्पाको भूमिका निर्वाह गरिरहेका छन् । अरु गरुन पो के ? आँफैले आफुलाई दास घोषणा गरेका छन् ।

देशमा व्याप्त चरम अव्यवस्था, गरिबी, बेरोजगारी, महंगी, कालोबजारीबाट कम्ता दुखी तिनीहरु पनि छैनन् । सन्तान र सन्ततिको चिन्ता तिनीहरुमा पनि नभएको कहाँ हो र ? तर बोल्न र विरोध गर्न सक्दैनन् । कारण उही दासता, उही गुलामी अनि विनासित्तैको लाज ।

मैले निजी अनुभव केसम्म पनि गरेको छु भने मञ्चबाट सरकारको घोर समर्थन र वावाही गरेर फर्किएको कमरेड मित्र डेरामा आएर घ्वांक घ्वाक रोएको देखेको छु, सुनेको छु । सम्झाएको पनि छु र अहिले ती मित्र कता छन् सोधखोज चाँही गरेको छैन् ।

देशमा शिक्षा र चेतनाको स्तर दयनीय छ । अशिक्षित त अशिक्षित नै भए, देश दुनियाँको बारेमा ज्ञान छैन् । मान्छु तर आफुला

पढेलेखेको ठान्नेहरुलाई के भन्ने ? यो पंक्तिका कार्यकर्तालाई थाहा छ, पार्टी गलत बाटोमा लाग्दैछ र यसबाट राष्ट्र र जनताको भलो हुँदैन भन्ने कुरामा ऊ स्पष्ट छ तर ऊ त्यहीं भित्र आफुलाई अवसर खोज्छ ।

साँढेको फल खस्ला र खाम्ला भनेर स्यालले झैं निरन्तर पछ्याई रहन्छ तर विडम्वना न त साँढेको फल खस्छ न उसको कामना पूर्ण नै हुन्छ तैपनि जीवनभर भौतारिरहन्छ । आफ्नोसँगै आफ्नाको पनि दिनचर्या जोखिममा पार्दछन् ।

तसर्थ मेरो त सम्पूर्ण वुवाआमा दाजुभाई सँग के मात्रै अनुरोध रहन्छ भने ३६५ दिन कांग्रेस, कम्युनिष्ट, पञ्चमण्डले हुनु भन्दा चुनावको दिन आफ्नो संवैधानिक अधिकार प्रयोग गर्नुस र आफुलाई योग्य लागेको व्यक्ति वा पार्टीलाई जिताउने कोशिश गर्नुस ।

यत्तिमात्रै गर्न सक्नु भयो भने तपाई, तपाईको समाज अनि तपाईको राष्ट्रले क्रमश विकासको काँचुली फेर्नेछ । सबैको जीवन सुखमय बन्नेछ साथै तपाईको गुलामीको दासताको अन्त्यपनि त्यही दिन हुनेछ । श्री पशुपतिनाथले सबैको कल्याण गरुन । ♦जर्मनीबाट