दैनिकजसो विद्युत् कटौती हुँदा उपभोक्ता मारमा

१८ माघ,काठमाडौं । डोटीको जिल्ला सदरमुकाम सिलगढी तथा दिपायलमा एक महिनायता दैनिकजसो भइरहेको विद्युत् कटौतीले उपभोक्ता मारमा परेका छन् ।

पूर्व सूचनाबिना विद्युत् कार्यालयले पटकपटक विद्युत् कटौती गर्न थालेपछि स्थानीयवासी आक्रोशित हुन थालेका छन् । विद्युत् अनियमितका कारण यहाँका मिल व्यवसायीदेखि इलेक्ट्रोनिक व्यवसायी बढी मारमा परेको व्यवसायीहरु बताउछन् । साँझ र बिहानपख तालीकाबिना लोडसेडिङ हुँदा घरेलु उपभोक्ता बढी समस्यामा परेका छन् ।

विद्युत् अनियमितताका कारण एफएम रेडियो तथा पत्रपत्रिका पनि समयमा प्रकाशन तथा प्रशारण हुन नसकेको स्थानीय पत्रकारहरुले गुनासो गरेका छन् । पछिल्लो समय विद्युत् अनियमितका कारण व्यवसायी, बैंक, सहकारी, गैरसरकारी कार्यालयका काम कारवाहीमा असर पुगेको छ ।