पश्चिमी सीमाबाट स्वदेश फर्कनेहरुको एन्टिजेन विधिबाट कोरोना परीक्षण

११ चैत, कञ्चनपुर । पश्चिमी सीमा नाका गड्डचौकी र डोके बजार भएर भारतबाट स्वदेश फर्कने यात्रुहरुको एन्टिजेन विधिबाट कोरोना परीक्षण सुरु गरिएको छ। सीमा नाकाको हेल्थ डेस्कमा स्वास्थ्यकर्मीको व्यवस्था गरी परीक्षण सुरु गरिएको हो।

‘दुई दिनअघि एन्टिजेन विधिबाट कोरोनाका शंकास्पद बिरामीको परीक्षण सुरु गरेका छौं,’ स्वास्थ्य कार्यालय कञ्चनपुरका प्रमुख शिवराज सुनारले भने, ‘ज्वरो, खोकीलगायतका कोरोनासँग मिल्दाजुल्दा लक्षण भएका व्यक्तिहरुको परीक्षण भैरहेको छ।’

कोरोनाको संक्रमण बढी देखिएका भारतीय सहरबाट फर्किएकालाई निगरानीमा राख्ने कार्य भैरहेको छ। शंकास्पद देखिए परीक्षण गर्ने व्यवस्था गरिएको छ। भारतमा कारोनाका बिरामी बढेपछि विभिन्न सहरमा लकडाउन गरिएको छ। ती सहरमा रहेका नेपालीहरु स्वदेश फर्किंने भएकाले सीमा नाकामा परीक्षणको कार्यलाई अगाडि बढाउन स्वास्थ्य मन्त्रालयले निर्देशन दिएको छ।

‘कोरोनाको संक्रमण बढेका भारतीय सहरमा काम गर्ने नेपालीहरु फर्कन सक्ने भएकाले सतर्कता अपनाएका छौं,’ स्वास्थ्य कार्यालय प्रमुख सुनारले भने, ‘पूर्व तयारी गर्न नपाउँदै सीमा नाकामा परीक्षणलाई अगाडि बढाउन निर्देशन आयो। एम्बुलेन्स, अस्पताल व्यवस्थापन, एन्टिजेनको पर्याप्तता र बजेटको व्यवस्था मिलाउन चुनौती छ। दुई तीन दिनभित्रै व्यवस्थापन समेत पूरा हुन्छ।’

सीमा नाकामा फर्कनेमध्येका शंकास्पद बिरामीको व्यवस्थापनका लागि प्रमुख जिल्ला अधिकारी, स्थानीय तहलगायतसँग समन्वयको कार्य भैरहेको उनले बताए। कोरोना परीक्षणसँगै शंकास्पद बिरामीको सीमा नाकामा औलो परीक्षण गर्ने व्यवस्था समेत मिलाइएको छ। सीमा क्षेत्रमा सम्बन्धित नगरपालिका र स्वास्थ्य कार्यालयबाट जनशक्ति व्यवस्थापनको कार्य गरिएको छ।