नेप्से परिसूचकसँगै घट्यो कारोबार रकम, दुई कम्पनीको शेयरमा सकारात्मक सर्किट

१४ चैत, काठमाडौं । सोमबार नेप्सेमा दोहोरो अंकले गिरावट आएको छ । २५७४ विन्दुमा खुलेको बजार ३० दशमलव ४३ अंकले घटेर २५४२ विन्दुमा झरेको हो ।

यस दिन सेन्सेटिभ इण्डेक्स ५.२ अंक घटेको छ भने फ्लोट इण्डेक्स २.१४ अंक र सेन्सेटिभ फ्लोट इण्डेक्स १.९२ अंक घटेको छ।

यस दिन नेप्से ओरालो लागेसँगै कारोबार रकम पनि घटेको छ। अघिल्लो कारोबार दिन ४ अर्ब ९८ करोडको शेयर खरिदबिक्री भएको नेप्सेमा यस दिन २३१ स्टकको ६२ हजार १६ पटकको कारोबारमा २ अर्ब ५४ करोड रुपैयाँ कारोबार भएको छ।

सोमबार २१ स्टकको मूल्य बढेको छ। जसमध्ये २ स्टकको मूल्य सकारात्मक सर्किट लेभलमा कारोबार भएको छ। यस दिन राष्ट्र उत्थान लघुवित्त र इमर्जीङ नेपालको शेयरमा सकारात्मक सर्किट लागेको हो ।

त्यस्तै जीवन विकास लघुवित्त, नेष्डो समृद्ध लघुवित्त, र जीवन विकास लघुवित्तको शेयरमूल्य उच्च दरले बढेको छ । यस दिन राष्ट्र उत्थान लघुवित्तको शेयरमूल्य ९० रुपैयाँले बढेर ९९१ रुपैयाँमा अन्तिम कारोबार भएको छ भने इमर्जीङ नेपालको ८३ रुपैयाँले बढेर ९२० रुपैयाँ र जीवन विकास लघुवित्तको ६८ रुपैयाँले बढेर ३३ सय ६८रुपैयाँमा अन्तिम कारोबार भएको छ।

यस दिन १६७ स्टकको मूल्य घटेको छ तर गिरावट दर भने कम रहेको छ। यस दिन आईसीएफसी फाइनान्सको शेयरमूल्य करिब ५ प्रतिशतले घटेको छ । त्यस्तै, सानिमा लाइफ इन्स्योरेन्सको साढे ४, ज्योति लाइफ इन्स्योरेन्सको करिब साढे ४ प्रतिशत र ग्रीन लाइफ हाइड्रोपावरको ४ दशालव ३८ प्रतिशतले शेयरमूल्य घटेका छ।

कारोबार रकमका आधारमा यस दिन जीवन विकास लघुवित्त शीर्ष स्थानमा रहेको छ। सो कम्पनीको यस दिन करिब २२ करोड २४ लाखको शेयर खरिदबिक्री भएको छ। त्यसैगरी, यस दिन अपी पावर कम्पनीको ९ करोड ३० लाख, हिमालयन डिष्टिलरीको ६ करोड ८ लाख र नेपाल लाइफ इन्स्योरेन्सको ५ करोड ७७ लाखको शेयर कारोबार भएको छ।