आईजीपीका व्याची पाँच डीआईजी परे एआईजी बढुवाको सिफारिसमा

९ जेठ, काठमाडौं । नेपाल प्रहरीका महानिरीक्षक धीरजप्रताप सिंहका व्याची पाँच डीआईजीहरु एआईजीमा बढुवाका लागि सिफारिसमा परेका छन् । उनीहरुलाई बढुवा समितिको आज बिहान बसेकाे बैठकले एआईजीमा बढुवाका लागि सिफरिस गरेको हो ।

सिफारिस हुनेहरूमा डीआईजी उत्तमराज सुवेदी, अरुणकुमार बिसी, दिवेश लोहनी, मुकुन्दराज आचार्य र पूजा सिंह छन् । उनीहरु सबै आईजीपी सिंहका व्याची हुन् । गृहमन्त्रालय अन्तर्गतको बढुवा समितिले नेपाल प्रहरीको उच्च पदमा बढुवाका लागि सोमबार सिफारिस गरेको हो ।

नेपाल प्रहरीमा हाल पाँच एआईजीको दरबन्दी रिक्त छ । यस अगाडीका प्रहरी महानिरीक्षक (आईजीपी) शैलेश थापा क्षेत्रीसँगै प्रहरी अतिरिक्त महानिरीक्षक (एआईजी)हरु हरिबहादुर पाल, निरजबहादुर शाही, प्रध्युम्नकुमार कार्की र बसन्तकुमार पन्तले बैशाख १८ गतेदेखि ३० बर्षे सेवाहदको कारण अनिवार्य अवकाश पाएका थिए ।

त्यसपछि डीआईजी बसन्तकुमार लामालाई एआईजीमा एकल बढुवा सिफारिस गरिएको थियो । बढुवा सिफारिसमा परेका लामाले एआईजीको ५६ बर्षे उमेरहदका कारण जेठ ७ देखि अनिवार्य अवकाश पाएका छन् । लामाको अवकाशपश्चात् नेपाल प्रहरीमा पाँच एआईजीको दरबन्दी रिक्त भएको हाे ।

रिक्त पाँच एआईजी पदमा डीआईजीहरु उत्तमराज सुवेदी, अरुणकुमार बिसी, दिवेश लोहनी, मुकुन्दराज आचार्य र पुजा सिंहलाई बढुवा सिफारिस गर्ने तयारी यस अगाडि नै गरिएको थियो । डीआईजीद्वय सुवेदी र बिसी २०७७ बैशाख ७ मा अनि डीआईजीद्वय लोहनी र आचार्य २०७७ पुस २० मा डीआईजीमा बढुवा भएका थिए ।

हालका आईजीपी धिरजप्रताप सिंहसँगै २०४९ चैत ११ मा प्रहरी निरिक्षकबाट नेपाल प्रहरीमा सेवा प्रवेश गरेका उनीहरुमध्ये सुवेदी, बिसी र लोहनी काबिल प्रहरी अधिकृतको रुपमा परिचित छन् ।

हाल डीआईजी सुवेदी उपत्यका प्रहरी कार्यालय रानीपोखरीको निमित्त प्रमुख, बिसी एक नम्बर प्रदेश प्रहरी प्रमुख, लोहनी गण्डकी प्रदेश प्रहरी प्रमुख, आचार्य राष्ट्रिय प्रहरी प्रशिक्षण प्रतिष्ठान महाराजगन्जको निमित्त कार्यकारी निर्देशक र सिंह बागमती प्रदेश प्रमुखको जिम्मेवारीमा कार्यरत छन् ।