एमालेले गरायो इन्धनको मूल्यवृद्धिमाथि संसदमा छलफल गर्न सार्वजनिक महत्वको प्रस्ताव दर्ता

१० जेठ, काठमाडौं । नेकपा एमालेले सरकारले गरेको इन्धनको मूल्यवृद्धिमाथि संघीय संसदमा छलफल हुनुपर्ने भन्दै सार्वजनिक महत्वको प्रस्ताव दर्ता गराएको छ । नेकपा एमाले र राप्रपाका सांसदले पेट्रोलियम पदार्थ, इन्धन र खाना पकाउने ग्यासको मूल्यवृद्धिमाथि संसदमा छलफलको माग गर्दै जरुरी सार्वजनिक महत्वको प्रस्ताव दर्ता गराएका हुन् ।

दर्ता भएको प्रस्तावको प्रस्तावकमा एमालेका मुख्य सचेतक विशाल भट्टराई छन् भने समर्थकमा एमालेका दुई सांसद र राप्रपाका राजेन्द्र लिङ्देन रहेका छन् । उनीहरुले प्रतिनिधिसभाका सचिव गोपालनाथ योगीसमक्ष प्रस्ताव दर्ता गराएका छन् ।
मुख्य सचेतक भट्टराइले पेट्रोलियम पदार्थको मूल्य स्वचालित कार्यविधिअनुसार नेपाल आयात हुने र बिक्री मूल्य परल मूल्य बमोजिम १५ दिनमा समायोजन गर्नसक्ने प्रावधान विरुद्ध सरकारले मुल्यबृद्धि गरेकाले प्रस्ताव लगेको बताएका छन् । प्रस्तावमा मुल्इबृद्धि फिर्ताको माग पनि गरिएको छ ।

सरकारसँग मूल्य वृद्धि न्यूनिकरणका लागि भएका प्रयासबारेका खाका माग गर्न संसदमा छलफल गर्न आवश्यक भएको भन्दै जरुरी सार्वजनिक महत्वको प्रस्ताव पेस गरिएको बताइएको छ । यसबाट प्रभावित जनजीवनलाई सहज बनाउन सरकारका योजना पनि माग गरिएको छ ।