उद्योगमन्त्री बडूले ओलीको भनाई स्तरहीन भनेर आलोचना गरेपछि एमालेले गर्यो संसद अवरुद्ध

१३ जेठ, काठमाडौं । नेकपा एमालेका अध्यक्ष केपी शर्मा ओलीले बिहीबारको संसद बैठकमा आयल निगमको विषयमा बोलेको कुरालाई उद्योग वाणिज्य तथा आपूर्तिमन्त्री दिलेन्द्रप्रसाद बडूले स्तरहीन भनेपछि नेकपा एमालेले संसद अवरुद्ध गरेको छ ।

शुक्रबार प्रतिनिधिसभाको बैठकमा विशेष समय लिएर बोलेका उद्योगमन्त्री बडूले प्रमुख प्रतिपक्षी दलका नेता केपी शर्मा ओलीले नीति तथा कार्यक्रममाथि छलफलका क्रममा दिएको अभिव्यक्तिलाई स्तरहीन भनेका थिए ।

लगतै एमाले सांसद खगराज अधिकारीले नियमापत्ति गरेका थिए । सभामुखले आफ्नो ध्यानाकर्षण भएको बताएपछि पनि मन्त्री बडूले आफ्नो सम्बोधन जारी राख्दै ओलीले नेपाल आयल निगम निजि क्षेत्रलाई दिन ठूलो रकमको डिल भइरहेको भन्ने भनाइको खण्डन गरे ।

‘आफू प्रधानमन्त्री हुँदा कमिसनको चास्नीमा रमाएको अवस्थामा सत्ता गुमाउन पुगेकाले कमिसन बाहेक के नै देख्नसक्छ र’ भनेपछि एमाले संसदहरु फेरि उठे । विपक्षी दलका नेतामाथि गरेको टिप्पणी रेकर्डबाट हटाउनुपर्ने एमाले सांसदको माग छ । एमालेको अवरोधपछि संसद बैठक १५ मिनेटका लागि स्थगित भएको छ ।