बालेनलाई बधाई दिँदै महामन्त्री शर्मा लेख्छन्, ‘उनको विजय राजनीतिक दलमाथि सकारात्मक दवाव हो’

१३ जेठ, काठमाडौं । नेपाली कांग्रेस महामन्त्री विश्वप्रकाश शर्माले काठमाडौं महानगरपालिकाको मेयरमा विजयी भएका बालेन्द्र साह (बालेन)लाई बधाई दिँदै उनको विजयले राजनीतिक दलहरूलाई सकारात्मक दवाव दिएको बताएका छन् ।

समाजिक सञ्जाल फेसबुकमार्फत महामन्त्री शर्माले बालेनको जितले बदलिएको समयअनुरुप राजनीतिक दल, नेतृत्व, व्यक्तिको प्रवृत्तिसँगै पद्दति बदल्नुपर्ने संकेत गरेको बताएका छन् । उनले सबै दल र नेताले आफूलाई बदल्नुपर्ने समय आएको भन्दै बालेनलाई बधाई दिन र आफूलाई बदल्ने सोच राखेर अगाडी बढ्न आग्रह गरेका छन् ।

शर्माले ठूला राजनीतिक दलको शैली र प्रस्तुतिप्रति असन्तुष्ट मतदाताले वैकल्पिक राजनीतिको नारा र दल नरोजेको तर, बदलिएर आउ भन्ने सन्देश दिएको बताएका छन् । वैकल्पिक राजनीतिको नारासहितका दल र उम्मेदवारको उपस्थिति मैदानमा हुँदाहुँदै पनि मतदाताले उनीहरुलाई नरोजेको बताएका छन् ।

काठमाडौंका मतदाताले दिएको सन्देश गहन रूपले आत्मसात गर्नुपर्ने पनि उनको भनाई छ । ‘मतदाताले विजयी बनाइसकेपछि बालेन एक्लै हुन् वा एक्लै छन् नसोचौँ । जनताको काममा जननिर्वाचित मेयरलाई सघाऔं,’ शर्माले लेखेका छन् । बालेनको जित आफूहरूको पराजय मात्र नभई उनीप्रति जनताको आशा र विश्वासको जित पनि भएको उनले बताएका छन् ।