सरकारलाई एमालेको प्रश्न, ‘बालेनको लौरो नुवाकोटे जनताको टाउकोमा किन बजारेको ?’

२६ जेठ, काठमाडौं । काठमाडौं महानगरपालिकामा थुप्रिएको फोहोर र बन्चरेडाँडामा स्थानीयले गरेको आन्दोलनलाई लिएर प्रतिनिधिसभाको बैठकमा सांसदहरुले रमाइलो गरिरहेका छन् ।

विगत तीन दिनदेखि प्रतिनिधिसभाको बैठकमा फोहोरको विषयलाई लिएर कांग्रेस र एमाले सांसदहरु आरोपप्रत्यारोपमा उत्रिरहेका छन् ।

बिहीबारको प्रतिनिधिसभामा नेकपा एमालेका सांसद नारायण प्रसाद खतिवडाले फोहोर व्यवस्थापनको नाममा नुवाकोटका जनतमाथि प्रहरी दमन भएको बताए । प्रतिनिधिसभा बैठकको सून्य समयमा बोल्दै उनले नुवाकाटेका जनतामाथि अन्याय भएको जनाए ।

‘यही जेठ महिनाको २४ र २५ गते नुवाकोटको ककनी र धादिङको धुनिवेशीको बीचमा बञ्चरेडाँडामा फोहोर व्यवस्थापन गर्ने निहुँमा नुवाकोटे जनतामाथि प्रहरी दमन भएको छ,’ संसदमा उनले भने, ‘स्थानीय चुनावमा चुनाव चिन्ह रहेको लौरो अहिले नुवाकोटे जनताको टाउको र ढाडमा बजारिन पुगेको छ ।’

काठमाडौं महानगरपालिकाका प्रमुख बालेन्द्र शाहले हालै सम्पन्न स्थानीय तह चुनावमा लौरो चिन्हमा चुनाव लडेका थिए । शाह काठमाडौं महानगरको प्रमुख भएपछि फोहोर व्यवस्थापनको नाममा नुवाकोटका जनतामाथि लौरो बजारिएको उनले बताएका हुन् ।

‘फोहोर व्यस्थापनको नाममा १७ वर्ष अगाडिदेखि नुवकोटमा जुन वेथिती भएको छ त्यसको व्यस्थापन गरेर, स्थानीय जनताको जायज माग सुनेर त्यो पुरा गरेर फोहोर व्यवस्थापन गर्ने व्यवस्था होस्,’ सांसद खतिवडाले भने । उनले सरकारले स्थानीयको मागलाई वेवास्ता गरी दमन गर्न बालेनको लौरो चलाएको आरोप लगाए ।