म देशलाई आघात पुर्याउने कुनै पनि सन्धी र सम्झौता गर्दिनः प्रधानमन्त्री देउवा

१ असार, काठमाडौं । प्रधानमन्त्री तथा नेपाली कांग्रेसका सभापति शेरबहादुर देउवाले राष्ट्रिय सहमति बिना आफुले कुनै पनि सन्धी र सम्झौता नगर्ने बताएका छन् ।

प्रधानमन्त्री निवास बालुवाटरमा बुधबार सत्ता गठबन्धन दलका शीर्ष नेताबीच भएको छलफलपछि उनले देशलाई आघात पुग्ने कुनै पनि सम्झौतामा कुनै देशले चासो राख्दैमा वा दवाव दिँदैमा आफूले नमान्ने स्पष्ट पारेका छन् ।

शीर्ष नेताबीचको छलफलबारे जानकारी दिदै जनता समाजवादी पार्टी नेपालका अध्यक्ष उपेन्द्र यादवले सहमति नभई प्रधानमन्त्री देउवाले कुनै पनि सम्झौता सहमति नगर्ने बताएको जानकारी दिए ।

संयुक्त राज्य अमेरिकासँग हुने भनिएको स्टेट पार्टनरशिप प्रोग्राम (एसपीपी) बारे सार्वजनिक बहस चलिरहेका बेला प्रधानमन्त्री देउवाले यस्तो सम्झौतामा हस्ताक्षर नगर्ने प्रतिबद्धता जनाएका हुन् ।

नेकपा माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाललगायत शीर्षनेताहरुबीच एसपीपी सम्झौताका विषयमा छलफल भएको थियो । छलफलमा संसदमा छलफल जारीरहेको बजेट पारित गर्ने लगायतका विषयमा पनि कुराकानी भएको थियो ।