अरिंगालले सताउँदा माहुरीपालक किसान समस्यामा

८ साउन, रुकुमपूर्व । रुकुमपूर्वको सिस्ने गाउँपालिका–३ पोखरामा अरिंगालले सताउँदा किसान समस्यामा परेका छन् । दिनहुँ अरिंगालले माहुरीको घार घेरो हाल्ने र माहुरी खान थालेपछि किसान समस्यामा परेका हुन् ।

पोखरामा माहुरीपालक किसान ओमप्रकाश खड्काले अरिंगालले सताउन थालेपछि हिजोआज एक जना माहुरीको हेरालो बस्नुपर्ने बाध्यता आइलागेको बताए । उनका १६० माहुरी घार छन् । उनका अनुसार यी सबै घार एकै ठाउँमा छैनन् । चरणका लागि विभिन्न पाँच ठाउँमा राखिएको छ । अहिले परिवारका चार सदस्य एकएक ठाउँमा माहुरी हेरालु बसेको र एक ठाउँमा हेरालु राख्न नसक्दा त्यहाँका माहुरी सबै अरिंगालले सखाप पारेको खड्काले बताए ।

उनले पोखरा घरमा, दान र माहुरी खर्कससँगै सिस्ने–५ को रुवाबाङमा माहुरी हेरालु एकएक जना बसेको तर भिङ भन्ने ठाउँमा हेरालु नहुँदा पाँच वटा घारको माहुरी सबै अरिंगालले सकेको उनको भनाइ छ । यस्तै पोखराकै अर्का माहुरीपालक किसान कमलाल खड्काले पनि अरिंगालले सताएर हैरान बनाएको बताए ।

उनले अहिले आफूसँग ११५ वटा माहुरी घार रहेको बताउँदै माहुरीलाई अरिंगालबाट जोगाउन हेरालो बस्दै आएको बताए । परिवारका अन्य सदस्यले घरको काम गर्ने र आफूले एक्लै माहुरी हेरालो बस्दा अरिंगालबाट जोगाउन भ्याइनभ्याइ हुने गरेको खड्काले सुनाए ।

पोखराकै अर्का किसान डिलबहादुर खड्काले पनि अअरिंगालले माहुरी खाएर साह्रै दुःख दिएको बताए । हुलकाहुल अरिंगाल आएर घार घेर्ने र कुनै बेलामा त घारभित्रै अरिंगाल पसेर माहुरी धपाउने गरेको उनले बताए । उनका अनुसार विगतका वर्षमा यसरी कहिल्यै पनि अरिंगालले सताउने गरेको थिएन । यस वर्ष अरिंगालका कारण पोखरामा आलोपालो गरेर प्रत्येक घरमा माहुरीको हेरालो बस्ने गरेका छन् । माहुरीको पकेट क्षेत्र र माहुरी ब्लक कार्यक्रम संचालन भएको यस ठाउँको प्रत्येक घरमा माहुरी छन् ।

यस्तै सिस्ने गाउँपालिका–५ स्थित रुक्मिणी माविमा रहेको माहुरीलाई पनि अरिंगालले सताएको छ । यस विद्यालयमा पढ्दै कमाउँदै कार्यक्रमअन्तर्गत ५० वटा माहुरीका घार छन् । अरिंगालका कारण माहुरी मासिन्छ कि भन्ने डर भइसकेको विद्यालयले जनाएको छ । अहिले जिल्लाको अन्य विभिन्न ठाउँमा पनि अरिंगालको कारण माहुरीपालक किसान समस्यामा परेको जानकारी प्राप्त भएका छन् ।