नाम सुशासन काम कुशासन, भ्रष्टाचार विरुद्धको अभियन्ताबाट यसरी लुटिदैछ स्थानीय तह

♦ दीपक शर्मा

२१ साउन, काठमाडौं । भ्रष्टाचारविरुद्धको अभियन्ता तथा सुशासनको हिमायति भएको दावी गर्ने बागेश्वरी असल शासन क्लब बाँके नेपालगञ्जले नागरिक सहायता कक्ष संचालनको नाममा बाँके र बर्दियामा करोडौं रुपैयाँ रकम लिएको खुलासा भएको छ । बागेश्वरी अशल शासन क्लबले नागरिक सहायता कक्ष संञ्चालनका लागी बाँके तथा बर्दियाका प्रत्येक स्थानीय तहबाट लाखौ रुपैयाँ असुल गरिएको देखिएको हो ।

नागरिक सहायता कक्ष सञ्चालनका लागि २० लाख ५१ हजार र त्यसमा उपमहानगरपालिकाले थप ४ लाख रुपैयाँ गरेर २४ लाख ५१ हजार, राप्ती सोनारी गाँउपालिकाले ४ लाख ३५ हजार , नरैनापुर गाँउपालिकाले ५ लाख रुपैयाँ भुक्तानी गरेको पाइएको हो । महालेखा परिक्षकको कार्यालयले सार्वजनिक गरेको पछिल्लो बार्षिक प्रतिवेदनमा वागेश्वरी असल शासन क्लबले नियमविपरित करोडौ रुपैयाँ रकम बुझेको देखाएको छ । वागेश्वरी असल शासन क्लब अर्थात बासले फुड बैंकको नामा ५ लाख रुपैयाँ समेत बुझेको देखिएको छ । बासले लिएको रकमको विल भरपाई तथा प्रमाण समेत नबुझाएको देखिएको छ ।

महालेखा परीक्षकको वार्षिक प्रतिवेदन २०७९ मा नेपालगञ्ज उपमहानगरपालिकाको महालेखा परीक्षणपछि सार्वजनिक गरेको प्रतिवेदनमा आर्थिक कार्यविधि तथा वित्तीय उत्तरदायित्व नियमावली २०७७ को नियम ३३ को उपनियम ५ मा सरकारी रकम खर्च गर्दा त्यस्ता रकम पुष्टि गर्न विल, भरपाई, कागज तथा प्रमाण संलग्न गर्नुपर्ने उल्लेख छ तर वासले सो नगरेको पाइएको हो ।

महालेखा परीक्षकको बार्षिक प्रतिवेदन २०७९ को नेपालगञ्ज उपमहानगर पालिकाको प्रतिवेदन अन्तर्गतको पेज न ६१ मा गैससमार्फत कार्य अन्तरगत हेल्प डेस्क संचालनका नाममा विभिन्न वडाबाट १ लाख रुपैयाँदेखि ३ लाखसम्म असुल गरिएको देखाएको छ ।

यसै गरी पेज न ७३ मा पनि हेल्प डेस्क संचालनका नाममा रकम खर्च भएको देखिएको छ । आर्थिक वर्ष २०७७ । ७८ मा महालेखा परीक्षकको बार्षिक प्रतिवेदनले वासको कुशासनलाई उजागर गरिदिएको छ । थिति बसाउने स‌स्थाले बेथितिलाई कसरी स‌स्थागत बनाउछ भन्ने उदाहरण बनेको वासले स्थानीय सरकारसँग गर्न नहुने काममा सम्झौता गरेर छर्लङ्घ पारिदिएको छ । सुशासनका नाममा कुसासन काम भएको देखिदाँ आम नागरिक अचम्मित बनेका छन ।