नियम मिचेर राखिएका निजी सुरक्षाकर्मी ४८ घण्टाभित्र फिर्ता गर्न गृहको निर्देशन

१२ पुष, काठमाडौं । गृह मन्त्रालयले बहालवाला तथा पूर्वकर्मचारी र सुरक्षाकर्मीले नियममा तोकिएभन्दा विपरीत राखिएका व्यक्तिगत सुरक्षाकर्मी र सहयोगी ४८ घण्टाभित्र फिर्ता गर्न मातहतका सुरक्षा निकायलाई निर्देशन दिएको छ ।

मन्त्रालयका सहसचिव समेत रहेका प्रवक्ता फणिन्द्रमणि नेपालले मंगलबार एक विज्ञप्ति जारी गरी ‘विशिष्ट व्यक्तिहरुको सुरक्षा व्यवस्थापन कार्यविधि २०७७ को व्यवस्था भन्दा विपरीत सेवा सुविधा लिएको र व्यक्तिगत सुरक्षाकर्मी तथा सहयोगी राखेको भए ४८ घण्टाभित्र फिर्ता गर्न निर्देशन दिएका हुन् ।

बहालवाला तथा पूर्व कर्मचारीरसुरक्षाकर्मीहरुले विशिष्ट व्यक्तिहरुको सुरक्षा व्यवस्थापन कार्यविधि २०७७ ले व्यवस्था गरेभन्दा बढी संख्या भएमा तत्काल फिर्ता गरेर कार्यविधि कार्यान्वयनमा सहयोग गर्न अनुरोध गरिएको छ ।

ताेकिएभन्दा बढी संख्यामा राखिएकाे पाइएमा नियम उल्लंघन गरेकाे ठहरिने भन्दै कडा चेतावनी दिइएकाे छ । गृहमन्त्रीकाे रबि लामिछानेकाे निर्देशन बमाेजिम विज्ञप्ति जारी भएकाे बताइएकाे छ ।