प्रचण्ड नेतृत्वको सरकार ढाल्ने षडयन्त्र भइरहेको छः अध्यक्ष ओली

१ फागुन, दमक । नेकपा एमालेका अध्यक्ष केपी शर्मा ओलीले देशमा प्रचण्ड नेतृत्वको सरकार ढाल्ने षडयन्त्र भइरहेको बताएका छन् । उनले सरकार बनेको दुई महिना नपुग्दै सरकार ढाल्ने र देशमा राजीनितक अस्थिरता ल्याउन प्रतिक्रियावादी शक्तिहरु लागि रहेको बताएका छन् । गृहनगर झापाको दमकमा पुगेका ओलीले देशमा अस्थिरता ल्याउने शक्तिहरुको चलखेल बढेको बताए ।

सत्ता गठबन्धनमा खटपन भइरहेका बेला ओलीले सरकार ढाल्ने खेल भएको बताएका हुन । उनले कुन दल वा समूह यसमा लागेको छ भन्ने कुरा भने बताएन । नेपाली कांग्रेसले प्रधानमन्त्री प्रचण्डलाई विश्वासको मत दिएपछि ओली कांग्रेसप्रति सशंकित बन्दै आएका छन् । सत्ताबाहिर रहेका दलहरुले पनि अहिलेको सत्ता गठबन्धन धेरै अगाडी नजाने बताइरहेका छन । नेकपा एकीकृत समाजवादीका अध्यक्ष माधवकुमार नेपालले दुइदिन अघि राष्ट्रपतिको निर्वाचन पछि देशमा नयाँ राजनीतिक परिवर्तन आउने बताएका थिए ।

पूर्वप्रधानमन्त्रीसमेत रहेका ओलीले देशमा आफु पनि काम नगर्ने र अरूलाई पनि गर्न नदिने तत्वहरू सक्रिय रहेको बए । अहिले सरकार ढाल्ने षडयन्त्र भइरहेको भन्दै ओलीले अनेक प्रकारका षडयन्त्र भइरहेको र सो षडयन्त्रलाई चिर्दै अघि बढ्ने शक्ति सरकारमा रहेकाले निराश हुनुपर्ने अवस्था नरहेको बताए । एमालेले जसरी पनि यो सरकारलाई बचाएर लाने उनको दावी छ ।

देशलाई अघि बढाउने र विकास पक्षधर शक्ति पनि सरकारमा भएकाले निराश हुनुनपर्ने भन्दै ओलीले यो सरकारले जनभावनाअनुसार काम गरेर देशका समस्या समाधान गर्ने विश्वास व्यक्त गरे । आफ्नो निर्वाचन क्षेत्रमा शिक्षा, स्वास्थ्य, खानेपानी समस्या, तटबन्धलगायतका समस्या समाधान गर्दै लैजाने ओलीको अश्वासन छ । कृषिको आधुनिकीकरण, रोजगार सिर्जनालगायतका विषयमा पनि आफ्नो ध्यान गएको उनले बताए ।

उनी झापामा विभिन्न कार्यक्रममा सहभागी भएका छन् । आइतबार बेलुका उनी दमकमा भइरहेको एक धार्मिक अनुष्ठानमा समेत सहभागी भएका थिए । झापाको गौरादह –४ स्थित डोरामारी माविको नवनिर्मित भवनको पनि उनले उद्घाटन गरेका छन् । यसैगरी आफ्नै निर्वाचन क्षेत्रको कटकपुर–खयरबारी चाँदु खोलाको पुल उद्घाटन गरेका छन् ।