धर्म र राजनीतिको आडमा अतिवादीहरु जुर्मुराएः महासचिव पोखरेल

२१ फागुन, काठमाडौं । नेकपा एमालेका महासचिव शंकर पोखरेलले राजनीति र धर्मको नाममा अतिवादीहरु समाजमा विकृति फैसाउनेतर्फ लागेकाले सबै सचेत हुन हावस्यक रहेको बताएका छन् । उनले यसैका कारण नेपाली समाज अस्थिरता र अराजकतातर्फ गइरहेको बताए । उनले धर्म र राजनीतिलाई जोड्ने र समाजलाई अतिवादतिर लैजाने शक्तिहरूको चलखेल बढिरहेको दावी पनि गरेका छन् ।

आइतबार काठमाडौंमा सहिद यदुनाथ गौतमको स्मृतिमा आयोजित एक कार्यक्रममा बोल्दै महासचिव पोखरेलले त्यस्ता सामाजिक चुनौतीहरूविरुद्ध लड्नका लागि बलियो शक्तिको खाँचो रहेको बताए । उनले भने, ‘अहिले हाम्रो समाजमा सामाजिक असुरक्षाको वातावरण बनेको छ, समाजलाई जबर्जस्ती गलत बाटोमा लैजाने शक्तिहरू हाबी भइरहेका छन् । समाजमा अस्थिरता र अराजकताको चुनौती यसरी बढेको छ कि एकातिर सांस्कृतिक अतिवाद छ, जसले राजनीति र धर्मलाई जोड्ने प्रयास गरिरहेको छ । अर्कोतिर धर्मान्तरको प्रवृत्ति बढेको छ । जसले नेपालको मौलिक संस्कृतिलाई तहसनहस बनाइरहेको छ ।’

उनले नेपाली सांस्कृतिक मूल्य र मान्यतामाथिको आक्रमण बढ्दो रहेको बताए । महासचिव पोखरेलले देशमा आर्थिक संकट अर्को ठूलो समस्याका रुपमा रहेको बताए । देश आर्थिकरुपमा चरम संकटतर्फ उन्मुख छ भएको भन्दै नयाँ सरकार बनेपछि अर्थतन्त्रलाई संकटबाट बाहिर ल्याउन केही प्रयासहरु भएको तर फेरि समीकरण फेरिएको अवस्था आएकाले फेरि आशा गर्ने ठाउँहरू पछि धकेलिएको बताए । उनले लोकतान्त्रिक प्रणाली र सामाजिक न्यायका पक्षधर शक्तिहरू ध्रुविकृत हुनुपर्ने र बलियो राष्ट्रिय शक्ति बनाउनुपर्ने बताए ।