२१ सदस्यीय कार्यव्यवस्था समिति बनाउन दलहरु सहमत

२२ चैत, काठमाडौं । प्रतिनिधिसभाको कार्यव्यवस्था परामर्श समितिमा रहने सदस्यको टुंगो लागेको छ । दलीय आधारमा सबै दलको प्रतिनिधित्व रहनेगरी २१ सदस्यीय कार्यव्यवस्था परामर्श समितिमा रहने सदस्यको भागबण्डा टुंगो लागेको हो । अब दलहरुले नाम दिएपछि समितिले पूर्णता पाउनेछ ।

दलहरुबीच अहिले मिलेको भागबण्डाअनुसार कांग्रेसका ६, एमालेका पाँच, माओवादी केन्द्रका दुई सदस्य रहने सहमति भएको छ भने बाँकी सबै दललाई एक÷एक सदस्य बाँडफाँट भएको छ । सभामुखको अध्यक्षतामा रहने कार्यव्यवस्था परामर्श समितिमा उपसभामुख र कानुनमन्त्री पनि सदस्य रहन्छन् । स्वतन्त्र दलहरुका तर्फबाट एकजनाको प्रतिनिधित्व रहने टुंगो लागे पनि को हुने भन्ने टुंगो भने लागिसकेको छैन ।

प्रतिनिधि सभाको बैठकको कार्यसूची निर्धारण गर्ने समितिमा सभामुख, उपसभामुख, संघीय सरकारका कानुन, न्याय तथा संसदीय मामिलामन्त्री र सांसदहरुको प्रतिनिधित्व हुनेछ । सांसदहरुको प्रतिनिधित्व दलीय आधारमा हुनेछ । जसको संख्या बुधबार किटान गरिएको छ ।  

बुधबार सभामुख देवराज घिमिरे, उपसभामुख इन्दिरा राना, प्रतिनिधिसभामा प्रतिनिधित्व गर्ने दलका प्रमुख सचेतक, सचेतक तथा दलका सदस्यहरुको प्रतिनिधिबीचको छलफलमा भएको सहमति अनुसार कार्यव्यवस्था परामर्श समितिको बैठकमा कांग्रेसबाट ६ जना, एमालेबाट ५ जना, माओवादी केन्द्रबाट २ जना सदस्य रहनेछन् ।

त्यस्तै राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, एकीकृत समाजवादी पार्टी, जनमत पार्टी, लोकतान्त्रिक समाजवादी पार्टी र नागरिक उन्मुक्ति पार्टीका एक÷एक सांसद पनि कार्यव्यवस्था परामर्श समितिमा रहनेछन् । तीबाहेक अन्य दल तथा स्वतन्त्र सांसदको तर्फबाट १ जना सदस्य रहनेछन् ।