सर्वोच्चले खारेज गर्यो देउवा प्रतिपक्ष दलको नेता बन्न नमिल्ने सम्बन्धी रिट

२७ चैत, काठमाडौं । सर्वोच्च अदालतमा नेपाली कांग्रेसका सभापति शेरबहादुर देउवालाई प्रमुख प्रतिपक्ष दलको नेता हुन नमिल्ने भन्दै दायर गरिएको रिट खारेज भएको छ । 

आइतबार सर्वोच्चका न्यायाधीशद्वय डा.आनन्दमोहन भट्टराई र मनोजकुमार शर्माको इजलासले रिट खारेज गरेको हो । संसद सचिवालयको निर्णयविरूद्ध गएको माघ २५ गते अधिवक्ता विमलप्रसाद पोखरेलले सर्वोच्चमा उक्त रिट दायर गरेका थिए ।

कांग्रेसले प्रधानमन्त्री पुष्पकमल दहाल ‘प्रचण्ड’लाई पुष २६ गते विश्वासको मत दिएको भन्दै देउवा प्रतिपक्ष दलको नेता हुन अयोग्य रहेको जिकिर रिटमा गरिएको थियो । हाल रिटमा उल्लेख भए अनुसारको अवस्था छैन । अहिले नेकपा 'एमाले'का अध्यक्ष केपी शर्मा ओली प्रतिपक्ष दलका नेता छन् ।

यता सरकारलाई समर्थन गरेको दुई महिनाभन्दा धेरै अवधिको प्रमुख प्रतिपक्षी दलको नेताको सुविधा कांग्रेस सभापति शेरबहादुर देउवाले पाउने भएका छन् । रकम निकासा नगरे पनि संघीय संसद सचिवालयले यसको निर्णय गरिसकेको छ ।