एमालेभित्रका पूर्व माओवादीहरु गुमनामः प्रचण्ड र भट्टको भेटघाटले शंका उत्पन्न

८ वैशाख, काठमाडौं । एमालेभित्र रहेका पूर्वमाओवादी नेताहरू यति बेला गुमनाम रहेका छन् । पार्टीको मिसन ग्रासरुट अभियानमा एकाध स्थानबाहेक ती नेताहरू खट्ने अवस्था पनि आएन । फागुनको पहिलो सातामै पार्टीले मिसन ग्रास रुट अभियान शुरु गरेको भएपनि त्यसमा सचिव लेखराज भट्टले सुदुरपश्चिममा अलि बढी सक्रियता देखाए भने अन्य नेताहरूले त्यसमा खासै चासो राखेनन् ।

रामबहादुर थापा बादल भने एकाध स्थानबाहेक अन्य कतै नगई घरबाट बाहिर निस्केनन् । टोपबहादुर रायामाझी तथा उनका छोरालाई नेपाली नागरिकलाई नक्कली भूटानी शरणार्थी बनाएर अमेरिका पठाउने गिरोहसँग पैसा असुल गरेको आरोप लागेपछि रायमाझी समेत गुमनाम रहेका थिए । साथै बादलका छोरा प्रतीक थापा पनि असुली धन्दामा आइरहने नाम भएकाले उनी पनि गुमनाम जस्तै छन् ।

यस्तै बेलामा माओवादीका पूर्व नेता एवं एमालेका सुदुरपश्चिम इन्चार्ज लेखराज भट्टले प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डलाई भेटेको घटनाले एमालेको नेतृत्व तहमै एक प्रकारको शंका उपशंका उत्पन्न भएको छ । द्वन्दकालिन मुद्दामा प्रधानमन्त्री प्रचण्डका विरुद्ध सर्वोच्च अदालतमा मुद्दा परेपछि पूर्व माओवादीहरू एक ठाउँमा उभिएर त्यसका विरुद्ध विज्ञप्ति जारी गर्ने र सरकारलाई खबरदारी गर्ने काम गरेका भएपनि एमालेमा रहेका माओवादीहरू चुपचाप रहेका थिए । त्यस क्रममा प्रचण्डसँग भट्टको भेट हुँदा एमालेहरु सशंकित भएका हुन् ।

 तत्कालीन नेकपाको विभाजनमा केपी शर्मा ओलीलाई साथ दिएका र त्यसयता माओवादीसँग ‘पानी बाराबार’ को अवस्थामा रहेका भट्टले एकाएक आफ्नै घरमा बोलाएर प्रचण्डसँग भेट गरेपछि एमालेका शीर्ष नेताहरु सबैभन्दा धेरै सशंकित भएको स्रोतले जनाएको छ । गत चैत २५ गते प्रचण्डले कैलालीको अत्तरियास्थित भट्टको घरमा पुगेर भेटघाट गरेका थिए । उक्त भेटलाई भट्टले सामान्य रुपमा लिनुपर्ने बताइरहँदा एमाले नेताहरूले भने पूर्व माओवादीसँग खुलेर कुरा गर्न नखोजेको स्रोतको दावी छ । भट्टले प्रचण्डसँगको भेटबारे पारिवारिक मात्रै भएको बताएपनि एमालेका नेताहरूलाई स्वीकार गर्न असहज भैरहेको छ ।

सुदूरपश्चिम पुगेका बेला प्रचण्ड भट्टको घरमा छिरेको भनिए पनि वास्तवमा योजनाबद्ध भेटघाट भएको एमाले नेताहरुको बुझाई छ । एमालेमा सन्तुष्ट नरहेका भट्टलाई अध्यक्षसँग भेटाउन माओवादी सुदूरपश्चिम प्रदेशका नेताहरु लामो समयदेखि निरन्तर क्रियाशिल थिए । प्रचण्ड सुदूरपश्चिम विश्वविद्यालयको कार्यक्रममा पुगेका बेला  माओवादीमा रहेका लेखराजका ‘फ्यान’ तथा सुदूरपश्चिम प्रदेशसभा सदस्य ओमविक्रम भाट लगायतको पहलमा भेटघाट भएको एमालेका नेताहरुसँग सूचना पुगेको थियो । एमालेभित्र शंका उपशंकालाई कम गर्न भट्टले प्रचण्डको चाहनाअनुसार भेट भएको प्रतिक्रिया दिएको भएपनि त्यसमा षडयन्त्रको गन्ध रहेको एमालेका नेताहरुले गाइगुइ हल्ला गर्न थालेका छन् ।

प्रचण्ड र लेखराज यसअघि कैयौँ पटक सार्वजनिक कार्यक्रममा भेट हुँदा बोलचालसमेत भएको थिएन । २२ महिनादेखि उनीहरुको सम्वाद र भेटघाट बन्द थियो । एमाले अध्यक्ष ओलीको प्रतिगमन विरुद्धको आन्दोलनताका २०७७ माघ १७ गते धनगढीमा भएको कार्यक्रममा प्रचण्डले भट्टलाई ‘दलाल’ समेत भनेपछि बोलचाल बन्द भएको थियो । भट्ट एमालेका पूर्व उपाध्यक्ष भीम रावललाई पार्टीभित्र जिम्मेवारी दिने वार्ता समितिको सदस्य पनि रहेका छन् । विगतमा एमालेका स्थायी कमिटी सदस्य कर्ण थापासँग  भट्टको राम्रो सम्बन्ध भएपनि अहिले त्यो सम्बन्धमा विस्तारै दरार उत्पन्न भएको बताइएको छ ।