कोशी प्रदेश सरकारबाट फिर्ता आउन माओवादी केन्द्र र जसपालाई कांग्रेसको आग्रह

४ जेठ, काठमाडौं । नेपाली काङ्ग्रेस कोशी प्रदेश संसदीय दलको बैठकले प्रदेश सरकारबाट फिर्ता हुन माओवादी केन्द्र र जसपासँग आग्रह गरेको छ । आज बसेको बैठकले एमाले नेतृत्वको वर्तमान सरकारबाट तुरुन्त बाहिरिन आग्रह गर्ने निर्णय गरेको हो । 

काङ्ग्रेसको प्रदेश संसदीय दलको बिहीबार बसेको बैठकले केन्द्रको गठबन्धनअनुसार नै सरकार बनाउन ढिलो भएकाले दुई दललाई सरकार छाड्न आग्रह गरिएको नेता उद्धव थापाले बताए । सरकार छाडेपछि नयाँ सरकार गठनबारे छलफल सुरु गर्ने कांग्रेसको तयारी छ । कांग्रेस यो प्रदेशसभामा दोस्रो ठूलो दल हो । 

बैठकले पहिचान पक्षधरको आन्दोलनलाई सम्बोधन गर्न र आन्दोलनरत पक्षसँग वार्ता गर्नुपर्ने निर्णय गरेको छ । आगामी बजेट निर्माणका लागि सरकारलाई सुझाव दिन केदार कार्कीको नेतृत्वमा पाँच सदस्यीय समिति गठन गरेको उनले जानकारी दिए । 

केन्द्रमा सरकार समिकरण पविर्तन भएसँगै एमाले केन्द्र र ६ वटै प्रदेशबाट बाहिरिइसकेको छ । कोशी प्रदेशमा मात्र एमाले नेतृत्व सरकार रहेको छ । एमालेले सुदूरपश्चिम, गण्डकी र लुम्बिनी प्रदेशमा सरकारको नेतृत्व गुमाइसकेको छ ।