युवा संगठनले प्रधानमन्त्री प्रचण्डलाई बुझायो लाखौं हस्ताक्षर संकलित फाइल

१९ असार, काठमाडौं । नेकपा निकट युवा संगठन नेपालले  ‘राष्ट्रिय स्वाधीनताका लागि तपाईंको योगदान’ भन्ने मूल नाराका साथ संकलन गरेको हस्ताक्षर प्रधानमन्त्री पुष्पकमल दाहाल ‘प्रचण्ड’लाई बुझाएको छ । युवा संगठन नेपाल केन्द्रिय समितीका अध्यक्ष पाटन जंगलीको नेतृत्वमा गएको टोलीले हस्ताक्षर संकलित कपडासहित फाइल मंगलबार प्रधानमन्त्री प्रचण्डलाई बुझाएको हो ।

संगठनले सरकार र अमेरिकी परियोजना मिलेनियम च्यालेन्ज कर्पोरेसन (एसीसी)बीच भएको सम्झौता तत्काल खरेज, भारत सरकारद्वारा भारतीय संसद भवनमा राखिएको नेपाली भूभाग लुम्बिनी, कपिलवस्तु, विराटनगर लागयत समावेश भएको ‘अखण्ड भारत’ नक्सा हटाउनेबारे सरकारको धारणा माग, लघुवित्त वित्तीय संस्थाको चर्को ब्याज तथा मिटर ब्याजीविरुद्ध कारवाही र नेपाली श्रमिकहरुमाथि ठगी धन्दा मच्चाइरहेका म्यानपावर कम्पनीहरुलाइ कारवाही गर्नुपर्ने लगायत माग राखेर हस्ताक्षर संकलन गरेको थियो । 

संकलित हस्ताक्षर बुझ्दै प्रधानमन्त्री प्रचण्डले संगठनले उठाएका माग जायज रहेको भन्दै सम्बोधनका लागि सक्दो मेहनत गर्ने प्रतिवद्धता जनाए । प्रचण्ड नेतृत्वको माओवादी केन्द्र र नेकपा हालै गठित समाजवादी मोर्चामा सामेल छन् । मोर्चामा एकीकृत समाजवादी र जसपा पनि आवद्ध छन् । 

यि चार वटै  पार्टीका युवा संगठनहरुले संयुक्त रुपमा भ्रष्टाचारीविरुद्ध अभियान चलाउने तयारी गरेका छ ।