शिक्षा विधेयकप्रति थारु समूदायको आपत्ति, पारित गरिए कडा मूल्य चुकाउनुपर्ने चेतावनी

२२ साउन, काठमाडौं । सरकारले ल्याएको संघीय शिक्षा ऐन संशोधन गर्न ल्याएको शिक्षा विधेयकप्रति थारु समुदायले आपत्ति जनाएको छ । सोमबार काठमाडौंमा थरुहट थारुवान राष्ट्रिय मोर्चाले पक्रकार सम्मेलन गरेर विधेयक संशोधन गर्न माग गरेको छ । विधेयक जबर्जस्त पारित गरिए कडा मूल्य चुकाउनुपर्ने चेतावनी समेत दिएको छ । 

मोर्चाका संयोजक श्रवण चौधरीलगायत विज्ञहरुले विधेयकले सुनियोजित रूपले थारुहरूको अस्तित्व, पहिचान र अधिकार समाप्त गर्न खोजेको भन्दै उनीहरूले आपत्ति जनाए । 

सधैं राज्यको हेपाह र दमनमा पर्दै आइरहेको थारु समुदायलाई शिक्षा विधेयकमा पनि दमन गर्न खोजेको उनीहरुको भनाइ छ । उनीहरुले मधेशी, आदिवासी जनजाति, दलित, पिछडा वर्ग वा अल्पसंख्यक मुसलमान समुदायमा थारुलाई जोडेर २२ प्रतिशत आरक्षणमा सीमित गरेको भन्दै विरोध जनाए । 

विधेयक सच्याउन मंगलबारसम्मकाे समयसीमा दिने संयाेजक चाैधरीले पत्रकार सम्मेलनमा बताए ।

कार्यक्रममा कांग्रेसका नेता एवं प्रतिनिधिसभा सदस्य तेजुलाल चौधरीले संविधानको भावनाविपरीत शिक्षा विधेयक ल्याएको भन्दै विधेयकलाई मन्त्रिपरिषद्ले फिर्ता लिनुपर्ने बताए ।