नेकपाको सीसी बैठकमा उत्पादन र युवा शक्तिको चर्चा

३० साउन, काठमाडौं । नेत्रविक्रम चन्द ‘विप्लव’ नेतृत्वको नेकपाको केन्द्रीय समितिको चौथो पूर्ण बैठक (सीसी) पार्टी मुख्यालय कपिलवस्तुको शिवगढीमा जारी छ । सोमबार सुरु भएको बैठक भोलिसम्म चल्ने बताइएको छ । 

बैठकमा महासचिव विप्लवले प्रस्तुत गरेको राजनीतिक प्रतिवेदनमाथि केन्द्रीय सदस्य (सीसीएम)हरुले धारणा राख्ने क्रम चलिरहेको कार्यालयले जनाएको छ । बैठकमा स्थायी समिति सदस्य समेत रहेकी उमा भुजेल ‘शिलु’ले पार्टीले थालेको उत्पादन अभियानले मुलुकमा कायम रहेका जातीय र श्रम विभेदमा धक्का र नयाँ सँस्कारको सुरवात भएको धारणा राखेकी छन् । 

नेकपाले नेता कार्यकर्ता आफ्नै उत्पादनमा बाँच्ने नीति लिएयता यो वर्ष असारमा मात्र १०० बिगाहमा धान रोपाइँ गरेको छ । साथै श्रम अभियानले समाजमा नयाँ सभ्यताको विकास गर्नुका सँगै नेता कार्यकर्तामा नयाँ सत्साह र आत्मबल पैदा भएको बताइन् । 

यस्तै अर्का सदस्य कर्णजित बुढा ‘सुशिल’ले युवा पंक्ति राजनीतिक परिवर्तन र समाजवादमा पुग्ने मुख्य शक्ति भएको धारणा राखेका छन् । उनले युवालाई आधार बनाएर पार्टीको आगानी नीति तय हुनुपर्नेमा जोड दिए । 
नेता भरत बमले भारतसँगको खुला सीमा नियमन गर्नेबारे पार्टीले ठोस नीति लिनुपर्ने धारणा राखेका छन् । सीमा क्षेत्रमा हेल्थ डेक्स स्थापनाका लागि पार्टीले पहल लिनुपर्ने मत उनको थियो । केन्द्रीय सदस्यहरुले बोल्ने क्रम सकिएपछि महासचिव विप्लवले जवाफी धारणा राख्नेछन् ।