पूर्व–पश्चिम राजमार्गमा विद्युत प्राधिकरणले अलपत्र छाडेकाे तारबाट करेन्ट लागेर एकजनाको मृत्यु

३२ साउन, काठमाडौं । पूर्व–पश्चिम राजमार्गअन्तर्गत कञ्चनपुरकाे सडकमा लापरवाही तरिकाले छाडिएको तारबाट करेन्ट लागेर एक जनाको ज्यान गएको छ । जिल्लाको भीमदत्त नगरपालिका–१० सुकासालमा करेन्ट लागेर बुधबार साँझ स्थानीय ३५ वर्षीय दिनेश ओडको मृत्यु भएको हो । 

गम्भीर घाइते उनलाई उपचारका लागि महाकाली प्रादेशिक अस्पताल पुर्‍याउँदा चिकित्सकले मृत घोषणा गरेका थिए ।ओडको शव अहिले महाकाली प्रादेशिक अस्पतालमा राखिएको छ ।

विद्युत प्राधिकरणले लापरबाहीले तार भुइँमा लतारिँदा करेन्ट लागी ज्यान गएको आफन्तले बताएका छन् । लापरवाहीबाट ज्यान गएको भन्दै आफन्त र स्थानीयले बिहीबार बिहानभर पूर्व–पश्चिम राजमार्गमा टायर बालेर सवारी आवतजावत बन्द गरेका छन् । पूर्वपश्चिम राजमार्ग अन्तर्गत सुकासाल क्षेत्रमा गरेको प्रदर्शन अहिले पनि जारी छ ।

मृतक आफन्तले मृतकको परिवारलाई उचित क्षतिपूर्तिको माग गरेका छन् । प्रदर्शनकारीसँग प्राधिकरणले वार्ता गर्ने तयारी गरेको छ । यसमा समन्वय जिल्ला प्रशासन कार्यालयले गरिरहेको छ । मृतक ओडका श्रीमती र तीन छोराछोरी छन् ।