सीआईबीको हिरासतमा रहेका शेर्पासँगको कुराकानी बाहिरिएपछि अध्यागमनका महानिर्देशक गृहमा तानिए

७ भदौ, काठमाडौं । अध्यागमन विभागका महानिर्देशक झलकराम अधिकारीलाई गृह मन्त्रालयमा तानिएको छ । सुन तस्करी प्रकरणमा मुछिएका तिब्बती मूलका बेल्जियम नागरिक दावा शेर्पासँग च्याट संवाद गरेको पाइएपछि महानिर्देशक झलकराम अधिकारीलाई गृह मन्त्रालयमा तानिएको हो । 

मन्त्रालयले यसबारे के भएको हो अनुसन्धान गर्नका लागि मन्त्रालयमा तानिएको जनाएको छ । उनलाई मन्त्रालयको जगेडामा राखिएको छ । साउन ३ गतेको सुन तस्करी प्रकरणपछि पक्राउ परेका दावा छिरिङसँग नियमित सम्पर्क रहेको विवरण सार्वजनिक भएपछि अधिकारीलाई मन्त्रालयमा तानिएको हो ।

अधिकारीले सुन तस्करीमा मुछिएका दावा छिरिङसँग पटक पटक सम्पर्कमा रहेर कुरा गरेको म्यासेजसहितका विवरण केही दिन यता सार्वजनिक भइरहेका थिए । उनी १६ फागुन २०७९ मा अध्यागमन विभागको महानिर्देशक बनेका थिए । 

प्रधानमन्त्री तथा मन्त्रिपरिषदको कार्यालयमा रहेका उनलाई गृह मन्त्रालयमा ल्याएर तत्कालै विभागको महानिर्देशक बनाइएको थियो । उनी त्यसअघि राजश्व अनुसन्धान विभागको महानिर्देशकका रुपमा उनी कार्यरत थिए ।