मन्त्रालय बढाउने कुरामा केन्द्रले हस्तक्षेप गरे कांग्रेस सरकारबाट बाहिरिन्छः पुन

५ मंसिर, दाङ । नेपाली कांग्रेस लुम्बिनी प्रदेशका सभापति अमर पुनले लुम्बिनी प्रदेशमा मन्त्रालय बढाउने कुरा सान्दर्भिक नहुने बताएका छन् । उनले लुम्बिनी प्रदेश सरकार गठनमा केन्द्रबाट हस्तक्षेग गरेर सहमति गराउन खोजे कांग्रेस सरकारबाट बाहिरिने बताएका छन् । 

मंगलबार नेपाली कांग्रेसका कार्यकर्तासँग भेटघाट तथा चियापान कार्यक्रममा सभापति पुनले यस्तो भागबण्डा मिलाउन मन्त्रालयको संख्या बढाउन नमिल्ने बताए । यस विषयमा सोमबार पनि माओवादी केन्द्रका नेताहरुसँग छलफल भएको थियो । 

सोमबार सत्ता साझेदार माओवादीका नेताहरूसँग भएको छलफलमा माओवादीका नेता वर्षमान पुनले प्रदेशमा सहमति नभए केन्द्रीय स्तरबाट सहमति गराउने प्रयास हुने बताएपछि आफूले केन्द्रको हस्तक्षेप मान्न नहुने बताएको पुनले बताए । 

सभापति पुनले प्रदेश सरकार गठनमा कुनै पनि मन्त्रालय नबढाउने गरि पूर्णता दिन कांग्रेस प्रदेश समितिको वटमलाईन भएको जानकारी गराउँदा माओवादीका उपसचिव पुनले केन्द्रीय स्तरबाट मिल्छ भन्ने कुरा राखेका थिए । सभापति पुनले कांग्रेस सरकार छोड्न तयार रहेको तर, केन्द्रको दवावमा प्रदेश सरकार र मन्त्रालयमा तलमाथि गर्न नदिने बताए ।