करोडौं अस्पतालमा कवाडी छड प्रयोग गरेको भन्दै पूर्व मेयर कुशवाहले रोके निर्माण

२९ पुस, रौतहट । रौतहटको कटहरिया स्थित प्राथमिक केन्द्रको भवन निर्माणमा गुणस्तरहीन काम गरेको पाइएको छ । १५ बेडको स्वास्थ्य केन्द्र निर्माणको ठेक्का लिएका निर्माण व्यवसायी उपेन्द्र चौधारीले कवाडीको छड प्रयोग गरेको पाइएपछि कहरिया नगरपालिकाका पूर्व मेयर सियाराम कुशवाहाले रोक लगाइएका छन । 

संघीय सरकारको १९ करोड ७५ लाख भ्याट सहितको लगानीमा भवन निर्माणको लागि कटहरिया नगरपालिकाले आव्हान गरेको टेण्डर घटाघट प्रक्रिया मार्फत महालक्ष्मी धनन्जय, चौधरी जेविले ११ करोडमा साकार गरेको थियो । प्राथमिक स्वास्थ्य केन्द्र कटहरियाको हाता भित्र १५ शैंयाको भवन निर्माण अवधि  २ बर्ष रहेको  छ । 

पूर्व मेयर कुशवाहाले शनिबार स्थलगत अनुगमन निरीक्षण गर्दा निर्माण कम्पनीका निर्देशक उपेन्द्र प्रसाद चौधरीले जग निर्माणमा रोलर नै नचलाइ ढलान सुरु गरे पछि पूर्व मेयर कुशवाहाले निर्माण काम रोक्का गरेको बताएका छन । करीब २० करोडको भवनको जग नै बलियो भएन भने माथिको संरचना कमजोर हुने भएकाले निर्माण रोक्का गरिएको पूर्व मेयर कुशवाहाले बताएका छन । 

ठेकदारले निर्माण कम्पनीले निर्माण स्थलमा होर्डिङ बोर्ड समेत राखेका छैनन् । 

‘टेण्डर तथा निर्माणको स्टीमेटसहित ठेकदारलाई आउन भनेको छु,’ पूर्व मेयर कुहवाहले भने, ‘नगरपालिकाको ईन्जिनियरले निर्माण बारे स्पष्ट पारेपछि मात्र पुनः काम शुरू हुन्छ ।’ उनका अनुसार त्यतिमात्र नभइ ठेकदार चौधरीले करोडौंको भवन निर्माणमा पुरानो कवाडी रड प्रयोग गरिरहेका छन ।

सो अस्पतालको शिलन्यास २०७७ पुस १ गरेका दिन तत्कालीन नगर प्रमुख कुशवाहाले नै गरेका थिए । तर, भवन निर्माण हुने स्थानमा ठूलो खाडल बनाएर तीनबर्ष सम्पर्क बिहीन रहेका ठेकदार उपेन्द्र चौधरी अहिले बल्लतल्ल निर्माण कार्य सुरु गरेका हुन ।   

कटहरियाका बर्तमान मेयर अजयप्रकाश जैसवालले आफ्नो लामो प्रयासबाट अस्पताल भवनको निर्माण सुरु भएको बताएका छन । जैसवालका अनुसार सुरुमा अस्पताल भवन निर्माणको लागि मन्त्रालयबाट टेण्डरको प्रक्रियाको थालनी भएको थियो । मन्त्रालयबाट निर्माणको लागि रकम निकासा नहुँदा कुनै प्रक्रिया अगाडि बढेको थिएन ।

हाल मन्त्रालयमा लगातार दौडेर रकम निकासा, टेण्डर स्वीकृत गराएपछि मात्र अस्पताल भवन निर्माणको काम सुरु भएको मेयर जैसवालले दाबी गरेका छन ।