सिंहदरवारमा सरकार र लघुवित्त पीडितबीच वार्ता सुरु

१ चैत, काठमाडौं । सिंहदरबार सरकार र लघु वित्त पीडितहरू बीच वार्ता सुरु भएको छ । केहीबेर अघि सिंहदरबार स्थित अर्थ मन्त्रालयमा सरकारी टोली र लघु वित्त पीडितका प्रतिनिधिबीच वार्ता सुरु भएको हो ।वार्तामा अर्थ मन्त्रालयका सहसचिव नारायणप्रसाद रिसाल र लघु वित्त पीडितका तर्फबाट मणिराम ज्ञवालीले नेतृत्व गरेका छन् । सरकारले बुधबार वार्तामा आउन पत्राचार गरेको थियो ।  

मन्त्रालयले यसअघि नै समस्याको टुंगो नलाग्दासम्म लघुवित्तका ऋणीलाई घर घरमा गएर गैरकानुनी रुपमा बलजफ्ती नगर्न लघु वित्त सञ्चालकलाई निर्देशन दिएको थियो । नेपाल राष्ट्र बैंकबाट दिइएको नीति निर्देशन विपरीत कार्य गर्ने लघु वित्त वित्तीय संस्थाहरूमाथि छानबिन गरी कारबाहीको दायरामा ल्याउन यस अघि नै निर्देशन दिइएको हो । 

मन्त्रालयद्वारा सह–सहसचिव एवं वित्तीय क्षेत्र व्यवस्थापन तथा संस्थान महाशाखा प्रमुख नारायणप्रसाद रिसाल नेतृत्वमा गठित समितिले पीडितका प्रतिनिधिलाई वार्तामा बोलाएको थियो । उक्त समितिमा गृहमन्त्रालयका सह–सचिव एवं प्रवक्ता नारायणप्रसाद भट्टराई, कानून मन्त्रालयका उप–सचिव झइन्द्र गुरागाईं, नेपाल राष्ट्र बैंकका प्रतिनिधि छन् । समितिको सदस्य सचिवमा अर्थ मन्त्रालयका उप–सचिव केशव उप्रेती छन् ।