संसदको गतिरोध हटाउनेबारे सत्ता पक्ष र विपक्षीसँग छलफल गर्दै सभामुख

५ जेठ, काठमाडौं । सभामुख देवराज घिमिरेले सत्तापक्ष र विपक्षी कांग्रेसका सभापतिसहितका नेतासँग संसद अवरोधबारे छलफल गर्ने भएका छन् । प्रधानमन्त्री पुष्पकमल दाहाल प्रचण्ड र नेकपा एमाले अध्यक्ष केपी शर्मा ओलीसँगको छलफल तय भएपनि कांग्रेस सभापति शेरबहादुर देउवासँगको तय भएको छैन । 

सत्तापक्षसँग प्रधानमन्त्रीको सरकारी निवास बालुवाटारमा दिउँसो २ बजे हुने छलफल राखिएको छ । अवरुद्ध सदन खुलाउने विषयमा छलफल केन्द्रित हुने सभामुखको सचिवालयले जनाएको छ । 
 
घिमिरेले नेपाली कांग्रेसका सभापति शेरबहादुर देउवासँग पनि छलफल गर्ने तयारी गरेका छन् । कांग्रेसको अवरोधका कारण लगातार संसद् बैठक अवरुद्ध भएपछि सभामुख घिमिरेले सदन खुलाउने पहल गर्दै आएका छन् । 

सहकारीको बचत अपचलन बारे गृहमन्त्री रवि लामिछानेमाथि छानबिन गर्नका लागि समिति गठन गर्नुपर्ने कांग्रेसले बैठक अवरुद्ध गर्दै आएको छ । प्रतिनिधिसभाको बैठक भोलिका लागि बोलाइएको छ ।