युरोकपमा इटालीको विजयी सुरुवात

२ असार, काठमाडौं ।   इटालीले युरोकपमा विजयी सुरुवात गरेको छ । गएराति सम्पन्न समूह बी अन्तर्गतको खेलमा इटालीले अल्बानियालाई २-१ गोल अन्तरले पराजित गरेको हो । १-० गोलले पछि परेको इटालीले खेलमा कमब्याक गर्दै जित हासिल गरेको थियो ।

अल्बानियाका लागि नेडिम बज्रामीले खेलको २३ सेकेन्डमै गोल गरेर अल्बानियालाई सुरुवाती अग्रता दिलाएका थिए । बज्रामीले गरेको यो खेल युरोकपको इतिहासमै सबै भन्दा छिटो गरेको गोल बनेको छ ।

त्यस्तै इटालीले पनि खेलमा छिटो कमब्याक गर्दै खेलको ११ औ मिनेटमा अलेसान्द्रो बास्टोनी र निकोलो बारेलाको गोलमा अग्रता लिएको थियो । बास्टोनीले खेलको ११ औ मिनेटमा र बरेलाले खेलको १६ औ मिनेटमा गोल गरेका थिए ।

युरोकपको डिफेन्डिङ च्याम्पियन रहेको इटालीले यो जितपछि समूह बी मा महत्वपूर्ण ३ अंक हासिल गरेको छ । अब इटालीले अर्को खेल जुन २१ मा स्पेनसँग खेल्ने छ भने अल्बानियाले जुन १९ मा क्रोसियाको सामना गर्ने छ ।